اسلام آباد – 30 اپريل (اي پي پي) وزيراعظم جي روينيو واري خصوصي صلاحڪار هارون اختر خان چيو آهي ته موجوده حڪومت جي معاشي پاليسين جي نتيجي ۾ معيشت جي هر شعبي ۾ نمايان بهتري آئي آهي، پرڏيهي ناڻي جي ذخيرن، في ڪس آمدني، ناڻي واڌ، اسٽاڪ مارڪيٽ جي صورتحال، ٽيڪس ٽو جي ڊي پي ريشو، خدمتن، زراعت، تعميرات، وڏين صنعتن ۽ قرضن جي صورتحال 2013ع جي مقابلي ۾ تمام گهڻي بهتر آهي، روانگي واپار ۾ اضافو ٿي رهيو آهي، اقتصادي ايمرجنسي لاڳو جي مطالبي جو ڪو جواز نه آهي. سينيٽ ۾ ايندڙ مالي سال 19 -2018ع جي بجيٽ تي بحث ۾ حصو وٺندي هن چيو ته 2013ع ۾ پاڪستان جي واڌ جي شرح 2.2 کان 3 سيڪڙو جي وچ ۾ هئي، جيڪا هن وقت 5.8 سيڪڙو آهي.