اسلام آباد-29 آگسٽ (اي پي پي) واپار واري وفاقي وزير ڄام ڪمال خان اعلان ڪيو آهي ته حڪومت ايندڙ پنجن سالن لاءِ هڪ جامع ٽيڪسٽائل ۽ ريڊميٽ پاليسي ۽ قومي صنعتي پاليسيءَ کي حتم شڪل ڏئي رهي آهي، جنهن جو مقصد پاڪستان جي صنعت کي علائقائي طور تي چٽاڀيٽي بڻائڻ، واپاري رنڊڪن کي ختم ڪرڻ ۽ روانگي واپار ۾ پائيدار واڌ يقيني بڻائڻ آهي. اهڙو اظهار هن واپار واري وزارت ۾ رٿيل اجلاس جي صدارت ڪندي ڪيو. اجلاس ۾ چيئرمين پاڪستان ٽيڪسٽائل ڪائونسل عامر فياض شيخ، چيئرمين آل پاڪستان ٽيڪسٽائل ملز ايسوسيئيشن (اپٽما) ڪامران ارشد، فضل ڪلاٿ جي سي اي او رحمان نسيم ۽ اپٽما جي ايگزيڪيوٽو ڊائريڪٽر شاهد ستار شرڪت ڪئي، جڏهن ته صنعتن ۽ پيداوار بابت وزيراعظم جي خاص صلاحڪار هارون اختر پڻ اجلاس ۾ شريڪ ٿيو. وفاقي وزير چيو ته ٽيڪسٽائل ۽ ريڊميٽ پاليسي ان انداز ۾ جوڙي پئي وڃي ته پيداواري لاڳت ۾ گهٽتائي، وسيلن جي بهتر استعمال ۽ عمل کي جديد رُخن تي آندو وڃي، تحقيق ۽ ترقيءَ کي هٿي وٺرائي وڃي، شين ۽ مارڪيٽن ۾ جدت آندي وڃي ۽ پاڪستان جي عالمي مارڪيٽ ۾ حصو وڌايو وڃي. هن چيو ته پاڪستان کي پائيدار ترقيءَ لاءِ روانگي واپار تي ڀارڻو پوندو ۽ حڪومت ان ڳالهه کي يقيني بڻائي رهي آهي ته سمورا فيصلا اسٽيڪ هولڊرز سان مشاورت سان ڪيا وڃن. هن چيو ته پهريون ڀيرو حڪومت ۽ صنعت روانگي واپار ۾ واڌ جي عزم تي هڪ صفحي آهن. هن علائقي جي چٽاڀيٽي ڪندڙ ملڪن جي پاليسين جو تجزيو ڪرڻ جي صنعت جي تجويز جي آجيان ڪئي ۽ـ ڍاڪا جي پنهنجي هاڻوڪي دؤري جا مشاهدار به بيان ڪيا، جتي هن بنگلاديش جي صنعتي ترقي ۽ ريڊمينٽ گارمينٽس جي روانگي واپار ۾ شاندار ڪاميابين کي ويجهي کان ڏٺو. وزيراعظم جي خاص مددگار هارون اختر چيو ته نئين صنعتي پاليسي ڪجهه مخصوص شعبن تائين محدود نه هوندي پر هي وسيع صنعتي منظرنامي جو احاطو ڪندي. هن وضاحت ڪئي ته پاليسيءَ ۾ توانائي، ٽيرف ۽ ٽيڪسيشن، مالي معاونت، اڪنامڪ زونز سميت ٻين شعبن کي شامل ڪيو ويو آهي. هن وڌيڪ چيو ته گرين فيلڊ منصوبن جي سهولت، پبلڪ پرائيويٽ پارٽنرشپ تحت زمين ليز ماڊل ۽ سيڙپڪارن لاءِ ون ونڊو سهولتون به ان پاليسيءَ جو حصو هجن. هن چيو ته وزيراعظم جي ويزن تحت اهي دم سڄي ملڪ ۾ صنعتي ترقيءَ ۾ نيئن سگهه وجهندا. اپٽما جي وفد حڪومت کان درخواست ڪئي ته موجود رڪاوٽن کي ختم ڪيو وڃي ۽ اهڙو سازگار ماحول فراهم ڪيو وڃي جيڪو عالمي مارڪيٽ ۾ روانگي شعبي جي چٽاڀيٽيءَ کي متاثر نه ڪري.
