واشنگٽن-27 آگسٽ(اي پي پي) ٽرمپ انتظاميه، آمريڪي سپريم ڪورٽ کي درخواست ڪئي آهي ته پرڏيهي امداد لاءِ اربين ڊالر روڪڻ جي اجازت ڏني وڃي ۽ هڪ وفاقي عدالت جي ان حڪم کي چئلينج ڪيو آهي جنهن تحت حڪومت کي اهي ادائيگيون ڪرڻ جو چيو ويو هو. پرڏيهي ميڊيا مطابق آمريڪي انصاف کاتي ان سلسلي ۾ هڪ هنگامي اپيل دائر ڪئي آهي واضح رهي ته وفاقي عدالت، ٽرمپ انتظاميه کي سڄي دنيا ۾ پرڏيهي امداد فراهم ڪرڻ وارن ٺيڪيدارن کي لڳ ڀڳ 2 ارب ڊالرن جي واجب الادا ادائيگي ڪرڻ جو حڪم ڏنو هو. مارچ ۾ سپريم ڪورٽ، انتظاميه کي اهي ادائيگيون روڪڻ جي اجازت ڏيڻ کان انڪار ڪيو هو. ٽرمپ انتظاميه هاڻ هڪ حتمي فيصلي تي زور ڏئي رهي آهي ۽ ان جو موقف آهي ته جيڪڏهن سپريم ڪورٽ مداخلت نه ڪري ته هن کي هي ادائيگيون ڪرڻيون پونديون جنهن سان انتظاميه جي پرڏيهي پاليسي جي فيصلا متاثر ٿيندا.
