لنڊن -27 آگسٽ (اي پي پي) برطانوي گهرو وزارت غزه جي ڪيترن ئي شاگردن کي اميگريشن ڏيڻ تي اتفاق ڪيو آهي ته جيئن اهي برطانيه پاران فراهم ڪيل مڪمل تعليمي اسڪالرشپ تي پنهنجي تعليم جاري رکي سگهن. ميڊيا رپورٽن موجب اسڪالرشپس جي بنياد تي غزه سان تعلق رکندڙ شاگردن کي ايندڙ مهيني کان اها سهولت ميسر ٿيندي، جڏهن ته اهو لازمي هوندو ته غزه سان تعلق رکندڙ انهن شاگردن کي برطانيه پهچڻ کان اڳ بايوميٽرڪ جي مختلف معائنن مان گذرڻو پوندو. انهن شاگردن مان هر هڪ کي برطانيه ۾ اها سهولت ملڻ لاءِ اسرائيلي رياست جو اتفاق پڻ ضروري هوندو ۽ اسرائيل کي انهن شاگردن مان ڪنهن تي به ڪو اعتراض نه هوندو. برطانوي گهرو وزارت چيو آهي، ته وڌيڪ 30 شاگردن جي مدد لاءِ منصوبن جي پڻ منظوري ڏني وئي آهي ته جيئن خانگي اسڪيمن تحت اسڪالرشپس حاصل ڪندڙ اهي شاگرد برطانيه پهچي سگهن. ياد رهي ته برطانيه جي وزيراعظم گذريل مهيني اعلان ڪيو هو ته جيڪڏهن اسرائيلي رياست لازمي قدم نه کنيا ۽ جنگ بندي تي اتفاق نه ڪيو ته برطانيه فلسطيني رياست کي تسليم ڪندو.
