ڪراچي-17 آگسٽ (اي پي پي) سنڌ جي توانائي، ترقيءَ ۽ رٿابندي واري وزير سيد ناصر حسين شاهه چيو آهي ته صوبي ۾ 21 لک گهرن جي تعمير تيزيءَ سان جاري آهي، 8 لک گهر مڪمل ٿي چڪا آهن. ايس آءِ ڊي پاران جاري ڪيل پڌرائي موجب هن چيو ته سنڌ رورل سپورٽ اداري ذريعي 12 لک کان وڌيڪ عورتون پنهنجن پيرن تي بيهي چڪيون آهن. سيد ناصر حسين شاهه چيو ته سنڌ ملڪ جو واحد صوبو آهي جتي ماڻهو گهمڻ بدران رهڻ لاءِ ايندا آهن، جنھن ڪري ڪراچي ۾ آبادي جو دٻاءُ آھي ۽ آبادي ۾ واڌ سبب شھري رٿابندي جا مسئلا پيد ٿي رھيا آھن. توانائي واري صوبائي وزير چيو ته پاڪستان جي آئين تحت ڪنهن به پاڪستاني شهري کي ملڪ جي ڪنهن به حصي ۾ اچڻ ۽ رهڻ کان روڪي نٿو سگهجي. هن وڌيڪ چيو ته سنڌ حڪومت طرفان ڪچين آبادين جي بهتري ۽ ريسيٽلمنٽ لاءِ نجمي عالم هڪ بهترين منصوبو پيش ڪيو آهي ۽ ڪراچي ۾ ٽريفڪ جي دٻاءَ کي گهٽائڻ لاءِ وڏا منصوبا مڪمل ڪيا پيا وڃن. هن چيو ته شهرين کي بهتر ۽ متبادل سفري سهولتون ڏيڻ لاءِ لنڪ روڊن ۽ لوپس جي منصوبن تي ڪم ڪيو پيو وڃي.
