ڪراچي-05 آگسٽ (اي پي پي) سنڌ جي وڏي وزير سيد مراد علي شاهه يومِ استحصالِ ڪشمير جي موقعي تي سنڌ اسيمبلي اجلاس ۾ خطاب ڪندي چيو ته سڀ کان پهرين مان هن قرارداد جي مڪمل حمايت ڪريان ٿو. اڄ 5 آگسٽ، يعني ڇهون سال ٿي ويو جڏهن 2019ع ۾ هڪ صدارتي حڪم تحت مودي سرڪار ڀارت جي آئين جي آرٽيڪل 317 تحت ڏنل خصوصي حيثيت هندستاني قبضي هيٺ ڄمون ڪشمير کان واپس ورتي. ڄمون ڪشمير جي شهرين کي خاص رهائش جا حق حاصل هئا پر 5 آگسٽ 2019 تي صدارتي حڪم وسيلي اهو درجو ختم ڪيو ويو. دنيا جي تاريخ ۾ اهو پهريون ڀيرو ٿيو جو هڪ حڪومت پنهنجن ئي شهرين سان دوکيبازي ڪئي. مودي سرڪار پنهنجن شهرين، خاص طور تي ڪشميري عوام سان غداري ڪئي، سندن جائز حق کسيو، عالمي قانونن، قراردادن ۽ انساني حقن جي ڀڃڪڙي ڪئي. اسان 2019 کان وٺي اڄ تائين ان عمل کي رد ڪندا آيا آهيون. مان پڪ سان چوان ٿو ته هي اسيمبلي پڻ ان قرارداد جي حمايت ڪندي ۽ ڀارت جي غير قانوني ۽ غير انساني قدم کي رد ڪندي. هن چيو ته اڄ جو ڏينهن اسان کي ڪشميري ڀائرن جي قربانين، سندن حوصلي ۽ جدوجهد جي ياد ڏياري ٿو. اسين اڄ وري اهو عهد ڪريون ٿا ته ڀارتي حڪومت پرامن شهرين جو گهيرو ڪيو آهي، سندن آزادي کسي ورتي آهي، اظهارِ جي راءِ تي پابنديون آهن، ۽ روزانو انسانيت جي تذليل ٿي رهي آهي، جنهن جي اسين شديد مذمت ڪريون ٿا. مون کي فخر آهي ته مان ان پارٽي سان لاڳاپيل آهيان جنهن جو باني شهيد ذوالفقار علي ڀٽو هو. جڏهن هو پرڏيهي وزير هو، ۽ پوءِ وزيراعظم بڻيو ته ڪشمير جي آواز کي عالمي سطح تي بلند رکيو. اڄ به اسان کي سندس لفظ ياد آهن ته “مان ننڊ ۾ به ڪشمير بابت غلطي نه ٿو ڪري سگهان” ۽ “اسين ڪشمير لاءِ هزارين ساله جنگ لاءِ به تيار آهيون” – اهي جملا اسان جي پرڏيهي پاليسي جو بنياد آهن. بعد ۾ شهيد محترمه بينظير ڀٽو به ڪشمير جي ڪيس کي دنيا ۾ زندهه رکيو. مان پاڻ شاهد آهيان ته جلاوطني جي دوران به جڏهن هوءَ ٻاهرين ملڪن ۾ ويندي هئي ته خاص طور تي ڪشميري تنظيمن سان ملاقات ڪندي هئي جيڪي عام طور دنيا ۾ وساريا ويندا هئا. بعد ۾ صدر آصف علي زرداري صاحب پنهنجي صدارت دوران ڪشمير جو مسئلو گڏيل قومن ۽ ٻين عالمي فورمن تي اٿاريو. چيئرمين بلاول ڀٽو زرداري، جڏهن هو پاڪستان جي پرڏيهي وزير هو ته هن به عالمي فورمن تي ڪشميرين جي جدوجهد ۽ انساني حقن جي لتاڙ بابت آواز اٿاريو. وڏي وزير وڌيڪ چيو ته هن سال به جڏهن ڀارت مئي جي مهيني ۾ آزاد ڪشمير تي حملو ڪيو ته پاڪستان جي فوج، حڪومت ۽ عوام ڀارت کي ڀرپور جواب ڏنو. اسان هتي اسيمبليءَ ۾ به ٺهراءُ منظور ڪيا. 6 ۽7 مئي کان 10 مئي تائين هلندڙ جنگ جنهن کي “معرڪه حق” چئجي ٿو ان ۾ ڀارت کي شڪست ملي. سندن جهاز ۽ ايئر بيس تباهه ٿيا ۽ آخرڪار ڀارت کي آمريڪا کان جنگبنديءَ لاءِ مدد گهرڻي پئي. اسان جو کليل پيغام آهي ته ڀارت هاڻي ڪشميرين جي آواز کي نه ٿو بند ڪري سگهي. هيءَ ڳالهه اسان جي پرڏيهي پاليسي جي بنيادي جز آهي. ڪشمير پاڪستان جي شه رڳ آهي. اسين هتي اسيمبليءَ مان ڪشميرين کي يقين ڏيارينداسين ته سنڌ جو عوام، سنڌ حڪومت ۽ هيءَ اسيمبلي سندن حق لاءِ ساڻن گڏ بيٺي آهي. اسين سندن جدوجهد کي سلام پيش ڪريون ٿا، ڀارتي ظلم کي رد ڪريون ٿا، ۽ مطالبو ڪريون ٿا ته گڏيل قومن جي ٺهرائن تحت ڪشميرين کي سندن حقِ خوداراديت ڏنو وڃي. ڪشمير ڀارت جو نه، ڪشمير ڪشميرين جو آهي ۽ اهو صرف سندن حق آهي ته هو پاڻ فيصلو ڪن ته پنهنجي سرزمين کي ڪهڙي ملڪ سان ملائڻ چاهين ٿا. مان اميد ٿو ڪريان ته هن سال هندستان کي جيڪا شڪست ملي، تنهن مان هو سبق وٺندو، ۽ خاص ڪري 5 آگسٽ 2019 کان پوءِ جيڪي ظلم شروع ڪيا ويا، تن خلاف سندس عوام پاڻ آواز اٿاريندو. ان شاءَ الله، اسين ڪشميرين کي گڏيل قومن جي قراردادن مطابق سندن حق ڏيارينداسين. هن چيو ته اڄ جڏهن اسين ڪشميرين کي ياد ڪريون ٿا، ته اسان جو اخلاقي فرض آهي ته غزه ۾ جيڪي اسرائيلي ظلمن جا داستان لکيا پيا وڃن تن جي پڻ سخت مذمت ڪريون. اسين عالمي برادريءَ، خاص ڪري اسلامي ملڪن سان گڏوگڏ سڄي انسانيت کان مطالبو ڪريون ٿا ته غزه ۾ ٿيندڙ ظلم خلاف قدم کنيا وڃن. ڇو ته اها فقط مذهبي نه، پر انساني مسئلو آهي.
