ڪراچي-05 آگسٽ (اي پي پي)سنڌ سرڪار ڪي اليڪٽرڪ کي ريڊ لائن بي آر ٽي جي راھه ۾ ايندڙ رڪاوٽن کي 5 سيپٽمبر تائين منتقل ڪرڻ ۽ واٽر بورڊ کي بي آر ٽي ڪوريڊور ۾2.7 ڪلوميٽر تي ٻڌل ڪي فور منصوبي جي پائيپ لائن جو ڪم جلد مڪمل ڪرڻ جو حڪم ڏنو آھي.جاري ڪيل پريس رليز موجب سنڌ جي سينئر وزير شرجيل انعام ميمڻ جي صدارت ھيٺ بي آر ٽي منصوبي بابت اھم اجلاس ڪراچي ۾ ٿيو. اجلاس ۾ سيڪريٽري ٽرانسپورٽ اسد ضامن، سي اي او ٽرانس ڪراچي فواد غفار سومرو، انجنيئرز، ڪنسلٽنٽس، ڪي اليڪٽرڪ جي نمائندن ۽ ٻين شرڪت ڪئي. اجلاس ۾ اختيارين بي آر ٽي منصوبي ۾ اڳڀرائي جي حوالي سان تفصيلي بريفنگ ڏني. اجلاس ۾ منصوبي ۾ ايندڙ رنڊڪن جي خاتمي لاءِ قدمن ۽ منصوبي ۾ درپيش مسئلن جو جائزو ورتو ويو. سنڌ جي سينئر وزير شرجيل انعام ميمڻ اُن موقعي تي ھدايتون جاري ڪيون تھ منصوبي ۾ درپيش مسئلن کي فوري طور تي حل ڪيو وڃي ته جيئن منصوبي تي ڪم جي رفتار متاثر نه ٿئي. شرجيل انعام ميمڻ ڪي اليڪٽرڪ اختيارين کي حڪم جاري ڪيو تھ ريڊ لائن بي آر ٽي جي رستي ۾ ايندڙ سمورن رڪاوٽن جي منتقلي 15 سيپٽمبر تائين مڪمل ڪئي وڃي. ھن واٽر بورڊ اختيارين کي ھدايتون جاري ڪيون ته واٽر بورڊ انتظاميه جلد کان جلد ڪي فور پائيپ لائن جو مڪمل ڪري ته جيئن ڪم جي رواني متاثر نه ٿئي. ھن چيو ته ريڊ لائن بي آر ٽي عوام جو ھڪ اھم منصوبو آھي. ان سلسلي ۾ وڌيڪ دير برداشت نه ٿي ڪري سگھجي، سمورا اسٽيڪ ھولڊرز پاڻ ۾ رابطا وڌائين ۽ منصوبي تي بنا ڪنھن وقفي جي ڪم جاري رکن.
