گڏيل قومون-17 جولاءِ (اي پي پي) پاڪستان عالمي برادري کان غزه جي عوام کي سنگين بحران مان ڇوٽڪارو ڏيارڻ لاءِ فوري ۽ موثر قدم کڻڻ جو مطالبو ڪندي چيو آهي ته تاريخ اسان کي پرکيندي، تاريخ اسان کي خاموشي ۽ بي عملي سان نه پر انسانيت ۽ عالمي قانونن جو ساٿ ڏيڻ سان سڃاڻي. پاڪستان جي گڏيل قومن ۾ مستقل نمائندي آصف افتخار احمد سلامتي ڪائونسل ۾ غزه جي صورتحال تي هڪ بحث دوران چيو ته غزه مڪمل تباهي جي ڪناري تي آهي، هي هڪ انساني تباهي آهي جتي موت صرف بمباري سان نه پر انهن حالتن جي منظم تباهي جي ڪري اچي رهيو آهي جيڪي حالتون زندگي لاءِ ضروري آهن. پاڪستاني سفير چيو ته جڏهن غزه جي رهواسين کي بک سان ماريو پيو وڃي ۽ علائقي کي تباهه ڪيو پيو وڃي ته اهڙي صورت ۾ دنيا تماشائي نٿي بڻجي سگهي، هن نشاندهي ڪئي ته غزه ۾ 58 هزار کان وڌيڪ ماڻهو شهيد ٿي چڪا آهن جن ۾ اڪثريت عورتن ۽ ٻارن جي آهي، جڏهن ته هڪ لک 38 هزار کان وڌيڪ ماڻهو زخمي ٿي چڪا آهن ۽ سڄو علائقو ملبي ۾ تبديل ٿي چڪو آهي. آصف افتخار احمد چيو ته روزاني جي فوتگين کي معمول نه بڻجڻ ڏيون، هي صرف هڪ ٻي هيڊ لائين، هڪ ٻيو ٽڪر يا شمارياتي انگ ناهي پر هر انگ جي پويان هڪ انسان، هڪ ڪهاڻي ۽ هڪ خواب جيڪو ختم ٿي ويو، هڪ خاندان جيڪو وکري ويو. هن چيو ته عالمي برادري کي فوري طور تي ڪارروائي ڪرڻ گهرجي. هن مطالبو ڪيو ته فوري، غير مشروط ۽ مستقل جنگ بندي ٿئي، ناڪابندي ختم ڪئي وڃي، مڪمل، غير جانبدار ۽ بنا رڪاوٽ انساني امداد بحال ڪئي وڃي، يرغمالين ۽ فلسطيني قيدين کي فوري ۽ غير مشروط آزادي، قابض قوتن جي سمورين غير قانوني پاليسين ۽ قدمن سميت فلسطينن جي جبري بي دخلي کي واضح طور تي رد ڪيو وڃي. هن چيو ته ان بحران جي بنيادي سبب جو حل ڪڍيو وڃي، وچ اوڀر ۾ هڪ منصفاڻي ۽ ڊگهي امن لاءِ ٻه رياستي حل اڻٽر آهي جنهن تحت 1967ع کان پهرين جي سرحدن تي ٻڌل فلسطين هڪ آزاد ۽ خودمختيار رياست هجي ۽ ان جي گادي واري هنڌ القدس الشريف هجي، ان سلسلي ۾ اسان سعودي عرب ۽ فرانس جي صدارت هيٺ اعليٰ سطحي ڪانفرنس جا منتظر آهيون ۽ اميد ڪريون ٿا ته هي فوري نتيجا ڏيندڙ هوندي. يونيسيف جي ايگزيڪيٽو ڊائريڪٽر ڪيٿرين رسل ڪائونسل کي ٻڌايو ته غزه ۾ روزاني سراسري 28 ٻار ماريا پيا وڃن، هي انگ هڪ مڪمل ڪلاس روس جي برابر آهي، هن چيو ته گذريل 21 مهينن ۾ غزه ۾ 17 هزار کان وڌيڪ ٻار قتل ڪيا ويا آهن ۽ 33 هزار کان وڌيڪ زخمي ٿيا آهن، انهن مان ڪيترائي ٻار ان وقت نشانو بڻيا جڏهن هو انساني همدردي جي بنياد تي ورهائي ويندڙ امداد حاصل ڪرڻ لاءِ قطار ۾ بيٺل هئا، هي ان ڳالهه جو ثبوت آهي ته غزه ۾ ڪٿي به شهرين لاءِ محفوظ جڳهه ناهي بچي. هن جو چوڻ هو ته ٻار سياسي ڪردار ادا ناهن ڪندا، هو نه جنگيون شروع ڪندا آهن ۽ نه ئي هو انهن کي روڪي سگهن ٿا پر هو شديد اذيت برداشت ڪندا آهن ۽ سوچيندا آهن ته دنيا کين ڇو اڪيلو ڇڏيو آهي ۽ حقيقت اها ئي آهي ته اسان کين اڪيلو ڇڏيو آهي. پاڪستاني نمائندي آصف افتخار چيو ته هي سانحو اڻٽر نه هو، هي اسرائيل جي قابض طاقت، پاليسين ۽ فيصلن جو نتيجو آهي، ان کي روڪي سگهجي ٿو ۽ روڪڻ ضروري آهي.
