اسلام آباد-04 جولاءِ (اي پي پي) وزيراعظم جي هدايت تي جوڙيل صنعتي پاليسي ڪميٽين جو اعليٰ سطحي اجلاس صنعتن ۽ پيداوار بابت وزيراعظم جي خاص مددگار هارون اختر جي صدارت هيٺ منعقد ٿيو. اجلاس ۾ ڪميٽيءَ جي ميمبرن 8 ذيلي ڪميٽين جي سفارشن کي حتمي شڪل ڏني وئي، جن جو تفصيل سان جائزو ورتو ويو. ان موقعي تي صنعتي پاليسي جي عملدرآمد جي مرحلي جو باقائدي شروعات جو اعلان ڪيو ويو. هارون اختر ٻُڌايو ته صنعتي شعبي جو جي ڊي پي ۾ حصو 1996ع ۾ 26 سيڪڙو هو جيڪو 2025ع ۾ گهٽ ٿي 18 سيڪڙو رهجي ويو آهي، جيڪو ان ڳالهه جي عڪاسي ڪري ٿو ته صنعتي شعبي جي بحالي نهايت ضروري آهي. هن روانگي واپار ۾ واڌ ۽ آمدني واپار متبادل پيدا ڪرڻ تي زور ڏنو ته جيئن معيشت کي استحڪام ڏئي سگهجي. صنعتي شعبي کي درپيش چئلينجز کي مُنهن ڏيڻ لاءِ 8 ذيلي ڪميٽيون جوڙيون ويون هيون، ان جي اهم تجويزن موجب اسٽيٽ بئنڪ آف پاڪستان بيمار صنعتن جي بحالي ۽ قرضن جي حل لاءِ گائيڊ لائنز جاري ڪندي. ڪارپوريٽ ري هيبليٽيشن ايڪٽ 2018ع ۾ ترميمن جون تجويزون ڏنيون ويون آهن. بئنڪن کي هدايت ڪئي آهي ته هو ڊيٽا تي ٻَڌل اڳڪٿي جي نظام سان صنعتي بيماريءَ جي شروعاتي علامتن جي نشاندهي ڪن. صنعتي يونٽس جي درجابندي پاڪستان بئنڪنگ ايسوسيئيشن جي مشاورت سان طئي ڪئي وئي آهي. مينيوفيڪچرنگ سيڪٽر کي هٿي ڏيڻ لاءِ ڪارپوريٽ ٽيڪس کي 3 سالن ۾ 29 سيڪڙو کان گهٽ ڪري 26 سيڪڙو ڪرڻ جي تجويز ڏني وئي. ان کان علاوه ايس اي سي پي ايڪٽ، اينٽي مني لانڊرنگ ايڪٽ ۽ انڪم ٽيڪس آرڊيننس ۾ به ترميمن جي سفارش ڪئي وئي. تيز عملدرآمد کي يقيني بنائڻ لاءِ خاص مددگار هارون اختر 10 نيون عملدرآمد ذيلي ڪميٽيون جوڙي ڇڏيون آهن ۽ انهن کي هڪ هفتي اندر ٺوس نتيجا پيش ڪرڻ جي هدايت ڪئي. هن چيو ته نئين صنعتي پاليسي هڪ جامع پاليسي آهي، جيڪا پاڪستان ۾ صنعتي انقلاب جو سبب بڻجندي. هارون اختر ڪميٽين جي مختصر مُدي ۾ غير معمولي ڪم کي ساراهيو ۽ ٻُڌايو ته انهن جون تيار ڪيل سفارشون وزيراعظم محمد شهباز شريف کي پيش ڪيون ويون آهن جن تي هن اطمينان جو اظهار ڪيو.
