ڪراچي-17 اپريل (اي پي پي)سنڌ جي وڏي وزير سيد مراد علي شاهه ڪراچي کي پاڪستان جي معاشي مرڪز طور اجاڳر ڪندي چيو آهي ته سنڌ حڪومت شهر جي ٽرانسپورٽ، پاڻي ۽ نيڪال جي مسئلن جي حل لاءِ پرعزم آهي. هن چيو ته گرين ۽ اورنج لائن سميت ڪيترائي بس ريپڊ ٽرانزٽ (بي آر ٽي) اڳ ئي فعال آهن جڏهن ته ريڊ ۽ ييلو لائن سميت ٻي انفراسٽرڪچر وارن منصوبن تي ڪم جاري آهي. اهڙو اظهار هن انٽرنيشنل فنانس ڪارپوريشن (آءِ ايف سي) جي وفدسان ملاقات دوران ڪيو. وفد جي قيادت آءِ ايف سي جي گلوبل پبلڪ پرائيويٽ پارٽنرشپس، نجڪاري ۽ ڪارپوريٽ فنانس ايڊوائزري جي ڊائريڪٽر ڪري رهي هئي. ملاقات ۾ شھري ٽرانسپورٽ، پاڻي ۽ نيڪال جي منصوبن بابت ٻنهي ڌرين ان ڳالهه تي اتفاق ڪيو ته ڪراچي سميت ٻين علائقن ۾ خدمتن جي فراهمي ۽ شھري انفراسٽرڪچر جي بهتري لاءِ مستقبل ۾ پي پي پي منصوبن ۾ تعاون ڪنديون. وڏي وزير وفد کي صوبي بابت بريفنگ ڏيڻ سان گڏ روڊن جي ڄار، توانائي، صحت، تعليم ۽ ٽرانسپورٽ جي شعبن ۾ اڳڀرائي کي پڻ اجاگر ڪيو. ان موقعي تي آءِ ايف سي جي پبلڪ پرائيويٽ پارٽنرشپس ۽ نجڪاري بابت ڊائريڪٽر چيو ته سنڌ اهو صوبو آهي جيڪو 2008 کان پي پي پيز تي عملدرآمد ڪري رهيو آهي. هن وڌيڪ چيو ته اسان سمجهون ٿا ته عوام کي بھتر خدمتون فراهم ڪرڻ جو واحد رستو پي پي پي جو دائرو وڌائڻ آهي. اسان واقعي مستقبل جي منصوبن ۾ توهان سان شراڪت جي وڌيڪ موقعن کي ڳولهڻ لاءِ پرجوش آهيون. ان موقعي تي مس لنڊا ٻڌايو ته آءِ ايف سي دنيا ۾ 500 کان وڌيڪ منصوبن تي مشاورت ڪرڻ جو تجربو رکي ٿو ۽ هن اليڪٽرڪ بسون (اي-بسز) جي فائدن تي زور ڀريو جن ۾ گهٽ خرچ، گهٽ سار سنڀال جا خرچ ۽ ماحولياتي پائيداري شامل آهي. هن چيو ته 2025 ع تائين ڪامياب شھري ٽرانسپورٽ ماڊل ۾ 80 سيڪڙو بسون اي-بسز تي مشتمل هونديون. مراد علي شاهه تصديق ڪئي ته سنڌ حڪومت اڳ ۾ ئي ڪراچي ۾ اي-بسز متعارف ڪرائي چڪي آهي ۽ ان انگ کي 800 گاڏين تائين وڌائڻ جو منصوبو رکيو آهي. وڏي وزير چيو ته ڪراچي کي روزانو 1200 ملين گيلن پاڻي جي ضرورت آهي جيڪا موجوده فراهمي ان ضرورت کي پورو ڪرڻ لاءِ ناڪافي آهي جنهن سبب شديد کوٽ پيدا ٿي چڪي آهي. زير تعمير ڪي فور منصوبو مڪمل ٿيڻ بعد پاڻي جي فراهمي ۾ واڌارو ٿيندو. حڪومت سامونڊي پاڻي کي صاف ڪرڻ لاءِ ڊي سيلي نيشن پلانٽ لڳائڻ جي منصوبي تي به ڪم ڪري رهي آهي. وڏي وزير پي پي پي ماڊل تحت پاڻي بابت منصوبا شروع ڪرڻ ۾ دلچسپي ظاهر ڪئي. آءِ ايف سي انڊسٽريل استعمال لاءِ پاڻي جي علاج جون پلانٽ قائم ڪرڻ جي سفارش ڪئي ۽ تجويز ڏني ته پاڻي جي فراهمي ۽ ننيڪال جا منصوبا پڻ پي پي پي ماڊل تحت هجن. سندھ حڪومت پاران ميئر ڪراچي مرتضيٰ وهاب، پرنسپل سيڪريٽري آغا واصف، چيئرمين پي اينڊ ڊي بورڊ نجم شاه، سيڪريٽري ناڻو فياض جتوئي، ڊي جي پي پي پي يونٽ اسد ضامن ۽ ٻيا سينيئر آفيسران موجود هئا.
