برلن -08 جولاءِ (اي پي پي) ترڪيه جي صدر رجب طيب اردگان شام سان لاڳاپن جي بحالي طرف هڪ ڀيرو ٻيهر قدم وڌائيندي اهڙو اشارو ڏيندي چيو آهي، ته هو ڪنهن به وقت پنهنجي شام جي هم منصب بشار الاسد کي ترڪيه جي دوري جي دعوت ڏئي سگهي ٿو. العربيه اردو مطابق اها ڳالهه هن گذريل ڏينهن جرمني جي گادي واري هنڌ برلن مان هوائي سفر دوران صحافين سان ڳالهائيندي ڪئي. ترڪيه جي صدر يورو 2024ع لاءِ برلن ويل هو. هن چيو ته اسان ڪنهن به وقت شام جي صدر کي دوري جي دعوت ڏئي سگهون ٿا. هن چيو ته کيس روس جي صدر پيوٽن سميت ڪيترن ئي ٻين عالمي اڳواڻن مشورو ڏنو آهي، ته مان شام جي صدر بشار الاسد سان گڏ ترڪيه ۾ ملاقات ڪيان. هاڻي اسان ان مرحلي جي ويجهو پهچي ويا آهيون ته کيس دعوت ڏيون ۽ ان جذبي جو اظهار ڪيون، جنهن جو اظهار شام جي صدر ڪيو آهي.
