واشنگٽن-05 ڊسمبر (اي پي پي) وائيٽ هائوس خبردار ڪيو آهي ته يوڪرين لاءِ آمريڪي امداد هلندڙ سال جي آخر تائين ختم ٿي ويندي ۽ جيڪڏهن ڪانگريس نئين فنڊز جي فراهمي جي منظوري نه ڏني ته روسي صدر ولاديمير پيوٽن جنگ کٽي سگهي ٿو. فرانسيسي خابرو اداري مطابق صدر جوبائيڊن جي بجٽ ڊائريڪٽر شالينڊاينگ ريپبلڪن هائوس جي اسپيڪر مائيڪ جانسن جي نالي هڪ خط ۾ واضح طور تي چيو آهي ته جيڪڏهن يوڪرين لاءِ فوجي امداد بند ٿي ويندي ته روس خلاف يوڪرين جي مزاحمت کي شديد نقصان پهچندو. هن چيو ته ان وقت اسان وٽ فنڊز نه آهن ۽ لڳ ڀڳ وقت ختم ٿي ويو آهي. هن وڌيڪ چيو ته واضح طور تي چوڻ چاهيان ٿو ته ڪانگريس طرفان نئين فنڊنگ جي منظوري جي بغير، هلندڙ سال جي آخر تائين اسان وٽ يوڪرين لاءِ وڌيڪ هٿيارن، ساز ۽ سامان جي خريداري لاءِ وسيلا ختم ٿي ويندا.
