
اسلام آباد – 06 آگسٽ (اي پي پي) وزيراعظم عمران خان چيو آهي ته والاريل ڪشمير جي آئيني حيثيت ختم ڪرڻ جي ڀارتي قدم جي خلاف گڏيل قومن جي سلامتي ڪائونسل سميت هر فورم تي آواز بلند ڪنداسين، اسان انصاف جي عالمي عدالت ۾ وڃڻ جو سوچي رهيا آهيون، عالمي برادري ڀارت جي انهن ڪاررواين کي روڪرائي، ڀارتي قدم سان سڄي دنيا جو نقصان ٿيندو، ڪشميرين سان سڄو پاڪستان ئي نه پر مسلمان دنيا جو آواز آهي. پارليامينٽ جي گڏيل اجلاس ۾ پاليسي بيان ڏيندي وزيراعظم چيو ته اڄ جي گڏيل سيشن جي اهميت کي سمجهڻ گهرجي. هي سيشن رڳو ڪشمير يا پاڪستان نه پر پوري دنيا ڏسي رهي آهي. اڄ هتان اهو پيغام وڃڻ گهرجي ته پوري قوم ان معاملي تي گڏ آهي.