اسلام آباد – پهرين مئي (اي پي پي) وزيراعظم شاهد خاقان عباسي ”يوم مئي“ جي حوالي سان پورهيتن جي حقن جي تحفظ جو ورجاءُ ڪندي چيو آهي ته حڪومت ان ڳالهه تي يقين رکي ٿي ته صرف صحت مند، تعليم يافته ۽ سٺو معاوضو حاصل ڪندڙ افرادي قوت ملڪ جي سماجي ۽ اقتصادي ترقي جا هدف حاصل ڪرڻ کي يقيني بڻائي سگهي ٿي. يوم مئي جي حوالي سان وزيراعظم پنهنجي پيغام ۾ چيو آهي ته ملڪ جي ترقي ۾ ڪارڪنن جي محنت جو عنصر شامل آهي ۽ ملڪ جي تيز ۽ پائيدار معاشي ترقي ۾ افرادي قوت جو ڪردار مثالي آهي.
