اسلام آباد – 21 مئي (اي پي پي) چيني صدر شي جن پنگ ۽ وزيراعظم لي ڪي ڪيانگ پاڪ چين سفارتي لاڳاپن جي 65 هين سالگرهه جي موقعي تي پاڪستان جي حڪومت ۽ عوام کي مبارڪباد ڏيندي پاڪستان کي هڪ سٺو پاڙيسري، ويجهو دوست، بااعتماد حصيدار ۽ چين جو پيارو ڀاءُ قرار ڏنو آهي. صدر ممنون حسين ۽ وزيراعظم محمد نواز شريف جي نالي پنهنجي جدا جدا مبارڪباد وارن پيغامن ۾ چيني قيادت چيو ته پاڪ چين لاڳاپا عالمي ۽ اندروني حالتن جي تبديلي جي باوجود آزمائش جي هر گهڙيءَ تي پورو لٿا آهن ۽ انهن لاڳاپن ۾ مستقل اڳڀرائي ٿي آهي. چيني صدر شي جن پنگ چيو ته چين ۽ پاڪستان سدابهار اسٽريٽجڪ حصيدار آهن ۽ تازن سالن ۾ انهن جي لاڳاپن ۾ مضبوط اڳڀرائي ٿي آهي.
