اسلام آباد – 19 مئي (اي پي پي( وزيراعظم محمد نواز شريف چيو آهي ته پاڪستان جي اقتصادي انگ اکرن ۾ نمايان بهتري آئي آهي، جنهن جو اعتراف عالمي مالياتي ريٽنگ ادارا به ڪري رهيا آهن، پاڪستان جو شمار هاڻي تيزي سان ترقي ڪندڙ معيشتن ۾ ٿئي ٿو. هن اهڙن خيالن جو اظهار قومي اقتصادي ڪائونسل جي اجلاس جي صدارت ڪندي ڪيو. وزيراعظم چيو ته 5.28 سيڪڙو جي واڌ ويجهه جي شرح واکاڻ جوڳي آهي، وفاقي ۽ صوبائي حڪومتون ملڪ جي ترقي جي لاءِ هم آهنگي سان ڪم ڪري رهيون آهن. هن ٻڌايو ته چين ۾ بيلٽ اينڊ روڊ فورم جي دوران سمورا وڏا وزير ساڻس گڏ هئا ۽ دنيا ڏٺو ته ترقي جي لاءِ پاڪستان ۾ اتفاق راءِ آهي ۽ هي مثبت پيغام هو ته اسان متحد آهيون.
