هانگ ڪانگ – 17 مئي (اي پي پي( وزيراعظم محمد نواز شريف چيو آهي ته پاڪستان هڪ اڀرندڙ محفوظ ملڪ طور سامهون اچي رهيو آهي ۽ پنهنجي آزاداڻي سيڙپڪار پاليسين جي ڪري پائيدار ترقي جي راهه تي گامزن آهي. هو هانگ ڪانگ ۾ پاڪستان انويسٽمينٽ فورم ۾ ڪاروباري اڳواڻن کي خطاب ڪري رهيو هو. ون بيلٽ ون روڊ جي عنوان سان اهو فورم چائنا انوويٽو فنانس گروپ لميٽيڊ ۽ قونصليٽ جنرل آف پاڪستان منعقد ڪيو هو. وزيراعظم هانگ ڪانگ جي ڪاروباري برادري کي پاڪستان ۾ سيڙپڪاري ۽ ان جي جاگرافيائي بيهڪ انساني ۽ مادي وسيلن، سياسي استحڪام ۽ پرڪشش سيڙپڪار پاليسي مان فائدو کڻڻ جي دعوت ڏني. هن چيو ته ڪيترن ئي چئلينجن باوجود پاڪستان هڪ اڀرندڙ معيشت ۽ سيڙپڪاري ۽ ڪاروباري منزل بڻجي رهيو آهي. وزيراعظم چيو ته پاڪستان آبادي جي لحاظ کان دنيا جو ڇهون وڏو ملڪ آهي جتي 8 ڪروڙ جي آبادي وچولي طبقي تي مشتمل آهي ۽ سيڙپڪاري جي لاءِ پرڪشش ماحول آهي.
