اسلام آباد – 17 اپريل (اي پي پي) صدر ممنون حسين چيو آهي ته دهشتگردن ۽ انتهاپسندن جي خلاف اسلام جي آفاقي تعليم جي روشني ۾ جوابي وار جوڙڻ ۾ تعليمي ادارا ۽ عالم ۽ دانشور اهم ڪردار ادا ڪري سگهن ٿا. هن اها ڳالهه انٽرنيشنل اسلامڪ يونيورسٽي جي بورڊ آف ٽرسٽيز جي 12 هين اجلاس کي خطاب ڪندي چئي. صدر چيو ته سائنس ۽ ٽيڪنالاجي جي حقيقي تعليم کانسواءِ ڪا قوم ترقي نه ٿي ڪري سگهي. ان سلسلي ۾ هن تعليمي ادارن ۾ تحقيقي سرگرمين کي فروغ ڏيڻ جي هدايت ڪئي ته جيئن شاگردن جي علمي صلاحيتن ۾ اضافو ٿي سگهي ۽ اهي معاشري جي قيادت ڪري سگهن. صدر هدايت ڪئي ته انٽرنيشنل اسلامڪ يونيورسٽي گڏيل مفاد ۾ وچ اوڀر ۽ وچ ايشيا جي يونيورسٽين سان تعاون کي فروغ ڏي ۽ ان يونيورسٽي جا ٻين مسلمان ملڪن ۾ ڪئمپس پڻ قائم ڪيا وڃن.
