اسلام آباد – 14 آگسٽ (اي پي پي) وزيراعظم محمد نواز شريف چيو آهي ته 14 آگسٽ جي ڏينهن اسان کي وچن ڪرڻو آهي ته جيستائين زندهه آهيون پاڪستان جي سلامتي، بقاءَ ۽ استحڪام جي لاءِ هر دنياوي مفاد کي قربان ڪنداسين. وزيراعظم اهڙن خيالن جو اظهار آزادي جي ڏهاڙي جي موقعي تي پنهنجي پيغام ۾ ڪيو. وزيراعظم چيو آهي ته 14 آگسٽ جو اڄوڪو ڏهاڙو روايتي خوشي سان گڏوگڏ ڏک جي گهري احساس کي پڻ پنهنجي اندر سهيڙيل آهي، ڪوئيٽا جي شهيدن جو ڏک اڃا تازو آهي، اڄ اسان انهن شهيدن کي پڻ ياد ڪري رهيا آهيون جن هن آزادي کي قائم رکڻ جي لاءِ پنهنجي جانين جو نذرانو پيش ڪيو، اهو ڏهاڙو پاڪستاني قوم جي ان عزم سان اڀري رهيو آهي ته پاڪستان الله جي فضل سان سدائين قائم رهندو.
