اسلام آباد-27 آگسٽ (اي پي پي) قومي اسيمبليءَ جي اسپيڪر سردار اياز صادق پنجاب جي مختلف ضلعن ۾ تازين برساتن سبب ٿيل جاني ۽ مالي نقصان تي ڏُک ۽ افسوس جو اظهار ڪيو آهي. هن تازي سانوڻي جي برساتن جي نتيجي ۾ درياهن ۾ پاڻيءَ جي سطح ۾ غير معمولي واڌ ٿي، جنهن سبب عوام کي سخت ڏُکيائين کي مُنهن ڏيڻو پيو. هن چيو ته آزمائش جي هن گهڙيءَ ۾ پارليامينٽ ۽ پوري قوم متاثر ڀائرن ۽ ڀينرن سان مڪمل يڪجهتي جو اظهار ڪري ٿي. اسپيڪر لاڳاپيل ادارن ۽ ضلعي انتظاميه کي هدايت ڪئي ته متاثر علائقن ۾ وقت سر ۽ اثرائتي رليف ۽ ريسڪيو آپريشن کي يقيني بڻائين ۽ متاثرن ڪٽنبن کي هر ممڪن مدد لاءِ ٺوس قدم کڻن. اسپيڪر ڀارت طرفان غير اعلانيل طور تي درياهن ۾ پاڻي ڇڏڻ جي غير ذميداراڻه قدمن جي سخت لفظن ۾ مذمت ڪئي. هن چيو ته ڀارت عالمي قانونن جي سنگين ڀڃڪڙي ڪندي هڪ ئي وقت ۾ غير معمولي مقدار ۾ پاڻي ڇڏيو جنهن جي نتيجي ۾ پاڪستان ۾ تباهي آڻيندڙ ٻوڏ واري صورتحال پيدا ٿي جنهن سان پاڪستان کي کربين رپين جو نقصان برداشت ڪرڻو پيو.