اسلام آباد-27 آگسٽ (اي پي پي) پاڪ فوج جي سڌ سماءَ واري شعبي (آءِ ايس پي آر) جي ڊائريڪٽر جنرل احمد شريف چوڌري چيو آهي ته وزيراعظم محمد شهباز شريف ۽ آرمي چيف فيلڊ مارشل سيد عاصم منير جي خاص هدايتن تي پاڪ فوج ڪي پي ڪي، گلگت بلتستان ۽ پنجاب ۾ امدادي سرگرمين ۾ ڀرپور نموني حصو وٺي رهي آهي، امدادي ڪاررواين دوران پاڪ فوج جا 2 جوان شهيد ۽ 2 زخمي ٿي پيا، ڪي پي ڪي صوبي ۾ امدادي سرگرمين سان گڏوگڏ فتنه الخوارج ۽ دهشتگردن خلاف ڀرپور ڪارروايون جاري آهن. اهڙو اظهار هن اطلاعات ۽ نشريات واري وفاقي وزير عطاءُ الله تارڙ ۽ اين ڊي ايم اي جي چيئرمين ليفٽيننٽ جنرل انعام حيدر ملڪ سان پريس ڪانفرنس کي خطاب ڪندي ڪيو. ڊي جي آءِ ايس پي آر چيو ته وزراعظم شهباز شريف ۽ آرمي چيف فيلڊ مارشل سيد عاصم منير جي خاص هدايتن تي پاڪ فوج ڪي پي ڪي ۽ گلگت بلتستان ۽ پنجاب ۾ امدادي سرگرمين ۾ ڀرپور نموني حصو وٺي رهي آهي، پاڪ فوج جي جوانن کان علاوه هڪ انجنيئر برگيڊ ۽ 30 يونٽس فلڊ رليف لاءِ خدمتون سرانجام ڏئي رهيا آهن، ان ۾ هڪ انجنيئر برگيڊ، 19 انفنٽري، 7 انجنيئرز ۽ 4 ميڊيڪل يونٽس شامل آهن، ٻوڏ سٽيل علائقن ۾ آرميءَ جون 29 ميڊيڪل ڪيمپون قائم ڪيون ويون آهن، هاڻ تائين 20788 مريضن جو علاج ڪيو ويو آهي، 28 هزار ماڻهن کي ريسڪيو ڪيو ويو، ٻوڏ سٽيل علائقن ۾ 225 ٽن راشن ورهايو ويو آهي. هن چيو ته خراب موسم باوجود آرمي ايوي ايشن 26 اُڏامون ڪيون آهن، 3 وڏين پُلين جي مرمت ڪري ان کي بحال ڪيو ويو آهي. آرمي انجنيئرز سول انتظاميه سان گڏجي 104 شاهراهن کي بحال ڪيو، ڪي پي ڪي ۾ 100 ۽ گلگت بلتستان ۾ 4 روڊ بحال ڪيا ويا. هن چيو ته گوجرنوالا ڊويزن ۾ انفنٽري جا 6 يونٽس، انجنيئرنگ جا 2 يونٽ ٻيڙين ۽ ٻئي سامان سان گڏ موجود آهن. 2 ميڊيڪل ڪيمپ قائم ڪيا ويا آهن، سول انتظاميه سان گڏجي 6 هزار ماڻهن کي محفوظ ماڳن تي منتقل ڪيو ويو. هن چيو ته ورڪنگ بائونڊري ۽ سرحد تي پاڪ فوج چؤڪس آهي، پاڪ وطن جي دفاع لاءِ سرحدي چؤڪيءَ کي خالي نه ڇڏيو ويو، فرض جي ادائگي دوران 2 جوان شهيد ۽ 2 زخمي ٿيا آهن. ڪرتارپور صاحب ۾ ريسڪيو جو وڏو آپريشن ڪيو ويو آهي. قصور ۽ چونيان ۾ پاڪ فوج 9 هزار کان وڌيڪ ماڻهن ۽ چوپائي مال کي محفوظ هنڌن ڏانهن منتقل ڪيو آهي. هن چيو ته پاڪ فوج وزيراعظم محمد شهباز شريف جي هدايت تي حڪومت صوبائي حڪومتن ۽ سول ادارن سان گڏجي ڏُکئي وقت ۾ ڀرپور امدادي سرگرميون جاري رکيون آهن. اين ڊي ايم اي جي چيئرمين چيو ته سانوڻي جي برساتن جو اٺون اسپيل جاري آهي، ان کان پوءِ آخري اسپيل هوندو. ڀارت جي غير قانوني قبضي هيٺ والاريل ڄمون ڪشمير ۾ سخت برساتون ٿيون. گذريل رات ڄمون جي ڀرپاسي ۾ 300 ملي ميٽر کان وڌيڪ برسات ٿي، اتي برسات ۽ ڪڪر ڦاٽڻ سبب سخت نقصان ٿيو. سيالڪوٽ جي اُتر ۽ اوڀر وارن علائقن ۾ 600 ملي ميٽر کان وڌيڪ برسات ٿي. هن چيو ته سنڌو درياهه ۾ بالا باغ، چشمه ۽ توسنه تائين وهڪرو معمول موجب آهي، جهلم درياهه تي منگلا تائين وهڪرو معمول موجب آهي، چناب درياهه ۾ مراله جي مقام تي گذريل رات وهڪرو 7 لک ڪيوسڪ تائين رڪارڊ ڪيو ويو، هاڻ ان جي شدت 5.5 لک ڪيوسڪ آهي. اُتر اوڀر علائقن ۾ برساتن جي شدت ۾ گهٽتائي سبب وهڪري ۾ وڌيڪ گهٽتائي ايندي. ڀارت مان ستلج، چناب ۽ راوي درياهن ۾ پاڻيءَ جو وهڪرو داخل ٿي چڪو آهي، خانڪي وٽ 10 لک ڪيوسڪ جو وهڪرو آهي، ايندڙ ڏينهن ۾ قادر آباد مٿان وهڪرو وڌندو، قادر آباد وٽ آرمي انجنيئرز ۽ پي ڊي ايم اي پنجاب جي حدن مان پاڻي جو دٻاءُ گهٽائڻ لاءِ گهارو هڻڻ جي رٿابندي ڪري رهيا آهن، خانڪي ۽ قادر آباد وچ ۾ ايندڙ 12 کان 14 ڪلاڪن ۾ وهڪري جي شدت برقرار رکڻ جو امڪان آهي، هيڊ تريمون وٽ هيٺئين درجي جي ٻوڏ آهي، راوي درياهه تي جسڙ وٽ 2 لک 30 هزار ڪيوسڪ جو وهڪرو آهي، جنهن سبب شاهدره ۾ 78 هزار ڪيوسڪ وهڪرو آهي، ان جي ڀرپور مانيٽرنگ ٿي رهي آهي، شاهدره ۽ بلوڪي ۾ پاڻيءَ جو دٻاءُ وڌي رهيو آهي، هاڻي اتي وچولي درجي جي ٻوڏ آهي. هن چيو ته ايندڙ ڏينهن ۾ سيالڪوٽ، نارووال، گوجرانوالا ۽ ان واڳيل علائقن ۾ وڌيڪ برساتن جو امڪان آهي جنهن سبب ڄاڻايل درياهن خاص ڪري شاهدره بلوڪي وٽ پاڻيءَ جو دٻاءُ وڌندو. ستلج درياهه تي گنڊا سنگهه والا وٽ 2.5 لک ڪيوسڪ جو وڏو وهڪرو گذري رهيو آهي، 2023ع ۾ به هتان ايتري ئي شدت جو وهڪرو گذريو هو، جنهن جي ڪري وڏي انگ ۾ ماڻهن کي مربوط طريقي سان ڪڍيو ويو هو، هن وقت گنڊا سنگهه والا تي مٿئين درجي جي ٻوڏ آهي. سليمانڪي وٽ هڪ لک، هيڊ اسلام تي 50 هزار کان وڌيڪ ڪيوسڪ جو وهڪرو آهي. هن چيو ته ايندڙ ڏينهن ۾ ستلج درياهه ويجهو رهندڙن کي محفوظ ماڳن تي منتقل ڪرڻ جي ضرورت آهي. پاڪ فوج، رينجرز، ريسڪيو 1122، پي ڊي ايم اي پنجاب ٻين ادارن سان گڏجي هاڻ تائين 2 لک 10 هزار ماڻهن کي محفوظ منتقل ڪيو ويو آهي. ماڻهن جي محفوظ ماڳن تائين منتقلي، علاج ۽ بحاليءَ ترجيح آهي. آرمي چيف فيلڊ مارشل سيد عاصم منير طرفان ملٽري فارميشنز کي هدايتون ڏنيون ويون آهن، انهن هدايتن تي سمورن لاڳاپيل فارميشنز پي ڊي ايم اي پنجاب سميت ٻين ادارن سان گڏجي امدادي سرگرمين ۾ وڌي چڙهي حصو وٺي رهيا آهن، هاڻ تائين ڪنهن فرد جي فوت ٿيڻ جو ڪو اطلاع ناهي. هن چيو ته هيڊ پنجند تي 58 هزار ڪيوسڪ وهڪرو آهي، جڏهن ته انهن دريائن جو وهڪرو هيڊ پنجند تي ملندو ته هي وهڪرو 6 لک تائين پهچي سگهي ٿو. هن چيو ته ايندڙ ڏينهن ۾ سنڌ حڪومت سان گڏجي عوام کي ارلي وارننگ نظام تحت ڪوٽڙي ۽ گڊو تي سمورن انگن کان پي ڊي ايم اي سنڌ کي آگاهه ڪنداسين ته جئين شهرين کي وقت سر ٻاهر ڪڍي سگهجي. هن چيو ته وزيراعظم محمد شهباز شريف جي هدايت تي اين ڊي ايم اي 5 هزار خيما پي ڊي ايم اي پنجاب کي پهچايا آهن، وزيراعظم جلد آفت سٽيل علائقن جو دؤرو پڻ ڪندو. هن چيو ته برسات جو نئون اسپيل 29 آگسٽ کان 9 سيپٽمبر تائين جاري رهندو، انهن علائقن ۾ وڌيڪ برساتن جو امڪان آهي، لاڳاپيل علائقن جي پي ڊي ايم ايز کي آگاهه ڪيو ويو آهي. آزاد ڄمون ۽ ڪشمير ۽ ڪي پي ڪي جي ڪجهه علائقن ۾ برساتن جو امڪان آهي، اين ڊي ايم اي جي ڊزاسٽر مئنجمينٽ الرٽ ايپ تي سموري ڄاڻ دستياب آهي.
