تهران-21 آگسٽ (اي پي پي) ايران چيو آهي ته يورپي ملڪن کي 2015ع جي ايٽمي معاهدي ۾ شامل سنيپ بيڪ ميڪينزم تحت پابنديون ٻيهر لاڳو ڪرڻ يا انهن کي فعال ڪرڻ جي آڪٽوبر جي آخري تاريخ ۾ واڌ ڪرڻ جو ڪو به حق ناهي. پرڏيهي ميڊيا موجب اها ڳالهه ايران جي پرڏيهي وزير عباس عراقچي هڪ بيان ۾ چئي. هن چيو ته جڏهن اسان اهو سمجهون ٿا ته کين سنيپ بيڪ ميڪينزم کي لاڳو ڪرڻ جو حق ناهي ته اهو فطري آهي ته انهن کي فعال ڪرڻ جي آخري تاريخ ۾ واڌ جو به حق ناهي. عباس عراقچي چيو ته اسان اڃان تائين يورپي ملڪن سان ڳالهين جي بنياد تي نه پهچي سگهيا آهيون، ايران عالمي ايٽمي توانائي ايجنسي سان مڪمل تعاون ختم نٿو ڪري سگهي پر ان جي معائنو ڪندڙن جي واپسي جو دارومدار قومي سلامتي جي اعليٰ ڪائونسل جي فيصلي تي آهي. واضح رهي ته ايران بار بار پابندين کي ٻيهر لاڳو ڪرڻ کي غير قانوني قرار ڏيندي خبردار ڪيو آهي ته جيڪڏهن يورپي طاقتون ان ميڪينزم کي فعال ڪن ٿيون ته ان جا نتيجا سنگين هوندا.
