واشنگٽن-15 آگسٽ (اي پي پي) آمريڪا ڀارت کي خبردار ڪيو آهي ته جيڪڏهن صدر ڊونلڊ ٽرمپ ۽ روسي صدر ولاديمير پيوٽن وچ ۾ ڳالهيون ناڪام ٿيون ته هو ڀارت تي وڌيڪ ٽيرف لاڳو ڪندو. پرڏيهي ميڊيا مطابق آمريڪي ناڻي واري وزير بيسنٽ بلوم برگ کي هڪ انٽرويو دوران ٻڌايو ته آمريڪا ڀارت تي اڳ ۾ ئي اضافي 25 سيڪڙو ٽيرف لاڳو ڪيو آهي، جيڪو وڌيڪ وڌائي سگهجي ٿو. ناڻي واري وزير ٻڌايو ته آمريڪا طرفان ڀارت تي 25 سيڪڙو ٽيرف اڳ ۾ لڳايو ويو آهي، جڏهن ته روس کان پيٽروليم مصنوعات خريد ڪرڻ لاءِ ايندڙ ڪجهه ڏينهن ۾ اضافي 25 سيڪڙو ٽيرف به لڳايو ويندو، جنهن بعد ڀارت کي ڪل 50 سيڪڙو ٽيرف کي منهن ڏيڻو پوندو. آمريڪي ناڻي واري وزير مطابق جيڪڏهن آمريڪا ۽ روس جون ڳالهيون ناڪام ٿيون ته ڀارت تي مجموعي ٽيرف 50 سيڪڙو کان به وڌي ويندو.
