حيدرآباد-06 آگسٽ (اي پي پي)راندين ۽ نوجوانن جي معاملن واري کاتي جشن آزادي ۽ معرڪه حق / آپريشن بنيان المرصوص جي ڪاميابيءَ جي خوشي ۾ هڪ رنگين اسپورٽس فيسٽيول پبلڪ اسڪول اسپورٽس گرائونڊ ۾ منعقد ڪيو. تقريب ڊسٽرڪٽ اسپورٽس آفيسر حيدرآباد مريم ڪيريو جي نگراني هيٺ منعقد ڪئي وئي، جنهن جي نگراني ۾ راندين جا مقابلا خوش اسلوبي سان ٿيا.تقريب جو خاص مهمان ڊويزنل ڪمشنر حيدرآباد فياض حسين عباسي هو. ان موقعي تي 100 ميٽر جي ڊوڙ مختلف ڪيٽيگريز ۾ ڪرائي وئي، رسہ ڪشي (Tug of War)، هاڪي جا مقابلا ۽ مارشل آرٽ جو به شاندار مظاهرو پيش ڪيو ويو.ڊويزنل ڪمشنر فياض حسين عباسي پنهنجي خطاب ۾ چيو ته راندين جون سرگرميون نوجوانن کي صحتمند، منظم ۽ مثبت طرزِ زندگي اختيار ڪرڻ جو موقعو فراهم ڪن ٿيون. هن چيو ته توهان سڀ پاڪستان جا سپاهي آهيو ۽ اڄ جو ڏينهن نه صرف آزاديءَ جو ڏينهن آهي پر معرڪہ حق ۽ آپريشن بنيان المرصوص جي فتح جي خوشي ۾ به ملهائجي ٿو. هن رانديگرن جي اسپورٽس مين اسپِرٽ کي ساراهيندي چيو ته سڀني شرڪت ڪندڙن هم آهنگي ۽ نظم و ضبط جو شاندار مظاهرو ڪيو آهي. راندين ۾ حيدرآباد ڊويزن جي مختلف اسڪولن جي شاگردن ۽ شاگردياڻين ڀرپور حصو ورتو.
