بيجنگ-06 آگسٽ(اي پي پي)چين هڪ ڀيرو ٻيهر ڪشمير مسئلي تي پنهنجي واضح ۽ مستقل موقف کي ٻيهر ورجائيندي چيو آهي ته گڏيل قومن جي چارٽر، سلامتي ڪائونسل جي لاڳاپيل قراردادن ۽ ٻطرفن معاهدن مطابق ڪشمير مسئلي جي مناسب ۽ پرامن حل جي ضرورت آهي. اها ڳالهه چين جي پرڏيهي وزارت جي ترجمان ڄمون ڪشمير جي حيثيت جي حوالي سان ڀارت جي هڪطرفن ۽ غيرقانوني قدمن کي 6 سال مڪمل ٿيڻ جي موقعي تي ڪئي. هن چيو ته ڪشمير مسئلو گڏيل قومن جي منشور، سلامتي ڪائونسل جي قراردادن ۽ ڌرين جي طئي ٿيل گڏيل معاهدن مطابق حل ٿيڻ گهرجي. هن لاڳاپيل ڌرين تي زور ڀريو ته هو هڪطرفن قدمن کان پاسو ڪن جنهن سان صورتحال وڌيڪ پيچيده ٿيندي. 5 آگسٽ 2019ع تي نريندر مودي جي قيادت ۾ ڀارتي حڪومت، ڄمون ڪشمير تي گڏيل قومن جي سلامتي ڪائونسل جي قراردادن ۽ عالمي قانون جي ڀڃڪڙي ڪندي آرٽيڪل 370 ۽ 35 – A کي ختم ڪري ڪشمير جي خاص حيثيت کي تبديل ڪري ڇڏيو. چين جي ترجمان چيو ته ڪشمير مسئلي تي چين جو موقف مستقل ۽ واضح آهي، هن وڌيڪ چيو ته ڪشمير مسئلو تاريخ جو ورثو آهي ۽ ان کي گڏيل قومن جي چارٽر، سلامتي ڪائونسل جي لاڳاپيل قراردادن ۽ ٻطرفن معاهدن مطابق پرامن طريقي سان حل ڪرڻ گهرجي. چين جو اهو بيان اهڙي وقت ۾ سامهون آيو آهي جڏهن پوري پاڪستاني قوم 5 آگسٽ کي يوم استحصال ڪشمير ملهايو.
