اسلام آباد – 06 – جون (اي پي پي) وزيراعظم جي ڊيجيٽل ميڊيا بابت خاص معاون فهد هارون گلگت بلتستان جي وڏي وزير حاجي گلبر خان ۽ وڏي وزير جي واپار ۽ نوجوانن جي معاملن بابت خاص معاون ذبيح الله سميت ٻين عملدارن سان ملاقات ڪئي. ملاقات ۾ گلگت بلتستان جي عالمي سطح تي شهرت يافته سياحتي شعبي کي وڌيڪ اجاگر ڪرڻ جي لاءِ ڊيجيٽل ميڊيا ۽ پبلڪ ڪميونيڪشن مان فائدو کڻڻ جي لاءِ گڏيل ڪوششن تي ڌيان ڏنو ويو. ملاقات ۾ نوجوانن کي بااختيار بڻائڻ ۽ خطي ۾ واپار جي فروغ تي پڻ ڳالهه ٻولهه ڪئي وئي جنهن ۾ پائيدار اقتصادي ترقي جي لاءِ گڏيل عزم تي زور ڏنو ويو. فهد هارون عالمي سطح تي خطي جي پروفائيل کي وڌائڻ ۽ وسيع تر سامعين کي شامل ڪرڻ جي لاءِ ڊيجيٽل پليٽ فارمز جي اهميت تي زور ڏنو. ان موقعي تي گلگت بلتستان جي وڏي وزير، خاص معاون ۽ ٻين عملدارن ڪيترن ئي شعبن ۾ اڳڀرائي کي اڳتي وڌائڻ جي لاءِ پنهنجي عزم جو ورجاءُ ڪيو. اهو گڏيل مڪالمو حصيداري کي مضبوط بڻائڻ ۾ هڪ اهم قدم جي نشاندهي ڪري ٿو جنهن جو مقصد جديد مواصلاتي حڪمت عملين جي ذريعي گلگت بلتستان جي اقتصادي ۽ سماجي ترقي کي وڌائڻ آهي. 2025ع جي لاءِ اهم عالمي ٽريول پليٽ فارمز پاران سڃاڻپ رکندڙ گلگت بلتستان پنهنجي قدرتي خوبصورتي ۽ متحرڪ ثقافت جي لاءِ نمايان ڌيان ڇڪرائي رهيو آهي.
