پيانگ يانگ _ 9 آڪٽوبر (اي پي پي )اتر ڪوريا جي اڳواڻ ڪم جونگ ان چيو آهي ته سندس ملڪ ايٽمي هٿيارن سان گڏ فوجي سپر پاور بڻجڻ طرف تيزي سان قدم وڌائيندو ۽ دشمن جي حملي جي صورت ۾ انهن جي استعمال کان پاسو نه ڪندو. پرڏيهي ميڊيا مطابق ڪم جونگ ان هڪ هفتي ۾ ٻيو ڀيرو ڏکڻ ڪوريا جي صدر يون سڪ يول جو نالو کڻي کيس خطي کي غير مستحڪم ڪرڻ جو ذميوار قرار ڏنو ۽ ان حقيقت تي روشني وڌي ته ڏکڻ ڪوريا وٽ ته مناسب اسٽريٽجڪ هٿيار به ناهن. اتر ڪوريا جي نيشنل ڊفينس يونيورسٽي کي خطاب ۾ ڪم جونگ ان چيو ته سچ پڇو ته اسان جو ڏکڻ ڪوريا تي حملو ڪرڻ جو قطعي ڪو ارادو ناهي. هن چيو ته جڏهن به اسان فوجي طاقت جي استعمال بابت پنهنجو موقف بيان ڪيو ته واضع طور تي ۽ مستقل جيڪڏهن ڪو لفظ استعمال ڪيو ته جيڪڏهن دشمن اسان جي ملڪ خلاف طاقت استعمال ڪرڻ جي ڪوشش ڪندو ته فوج بنا ڪنهن هٻڪ جي سموري جارحاڻي طاقت استعمال ڪندي .ايٽمي هٿيارن جي استعمال کي به نه روڪيو ويندو. هن چيو ته فوجي سپر پاور ۽ ايٽمي طاقت بڻجڻ طرف اسان جو قدم تيز هوندو. ياد رهي ته اتر ڪوريا ڪيترن ڏهاڪن کان ايٽمي هٿيارن جو پروگرام هلائي رهيو آهي ۽ خيال ڪيو پيو وڃي ته ان ملڪ وٽ ايٽمي هٿيار ٺاهڻ لاءِ تمام گهڻو ايٽمي مواد موجود آهي . هن زمين هيٺ 6 ايٽمي ڌماڪا به ڪيا آهن.
