دبئي _04 آڪٽوبر (اي پي پي) دبئي ۾ پيدا ٿيندڙ سمورن ٻارن کي لرنر پاسپورٽ جاري ڪرڻ جو فيصلو ڪيو ويو آهي. پرڏيهي خابرو اداري مطابق ناليج اينڊ هيومن ڊويلپمنٽ اٿارٽي (ڪي ايڇ ڊي اي) اعلان ڪيو آهي ته هاڻي دبئي ۾ هر نئين ڄاول ٻار کي سندس تعليمي رڪارڊ کي پورو ڪرڻ ۽ والدين کي پنهنجي ٻارن جي تعليم بابت باخبر ۽ فيصلو ڪرڻ ۾ مدد فراهم ڪرڻ لاءِ هڪ لرنر پاسپورٽ جاري ڪيو ويندو. اهو نظام دبئي هيلٿ اٿارٽي جي سهڪار سان لاڳو ڪيو ويندو. ڪي ايڇ ڊي اي جي ڊائريڪٽر جنرل عائشه ميران چيو ته لرنر پاسپورٽ جو مقصد هر ٻار جي تعليم جي حق جي ضمانت ڏيڻ آهي. اهو لازمي اسڪول جي عمر جي ٻارن کي رجسٽرڊ ڪندو ۽ سندن نگراني ڪندو ته جيئن اسڪول ۾ داخلا کي يقيني بڻائي سگهجي ۽ ان ڳالهه کي به يقيني بڻائي سگهجي ته ڪو ٻار تعليم کان محروم نه رهي سگهي. هن چيو ته دبئي ۾ سمورن ٻارن بابت ڄاڻڻ چاهيون ٿا ته جيئن اهو يقيني بڻائي سگهجي ته ڇا هو تعليمي نظام ۾ داخل آهن. جڏهن هڪ ٻار پيدا ٿئي ته کيس سسٽم ۾ داخل ڪيو وڃي ته جيئن اسان دستياب تعليمي مرحلي کي واضع طور تي سمجهي سگهون.
