گڏيل قومون-12 سيپٽمبر (اي پي پي) گڏيل قومن ۾ پاڪستان جي مستقل نمائندي منير اڪرم جنرل اسيمبلي جي نئين صدر ۽ ڪيمرون جي اڳوڻي وزيراعظم فليمون يانگ سان نيويارڪ ۾ گڏيل قومن جي هيڊڪوارٽر ۾ ملاقات ڪئي ۽ جنرل اسيمبلي جي 79 هين اجلاس جي ايجنڊا تي خيالن جي ڏي وٺ ڪئي ۽ کيس پاڪستان جي تعاون جي خاطري ڪرائي. پاڪستاني مشن طرفان جاري پريس رليز ۾ چيو ويو آهي ته پاڪستاني نمائندي فليمون يانگ کي گڏيل قومن جي جنرل اسيمبلي جي موجوده سيشن جي صدارت سنڀالڻ تي مبارڪون ڏنيون. منير اڪرم گذريل ڏينهن ملاقات دوران دنيا کي درپيش ڪيترن ئي سنگين بحرانن جي وچ ۾ پائيدار اقتصادي ترقي، امن ۽ سلامتي ۽ انساني وقار تي صدر يو اين جي اي جي ڌيان جي آجيان ڪئي. هن پاڪستان طرفان اميد ظاهر ڪئي ته گڏيل قومن سندس دانشمنداڻي قيادت ۾ عالمي چئلينجز کي منهن ڏيڻ ۾ ڪامياب ٿيندو. جنرل اسيمبلي جي صدر نيڪ خواهشن تي پاڪستاني نمائندي جو ٿورو مڃيو. هن ايڪس تي هڪ پوسٽ ۾ چيو ته هو گڏيل قومن ۾ پاڪستان جي مستقل نمائندي منير اڪرم سان ملاقات، يو اين جي اي جي آئنده ٿيندڙ 79 هين اجلاس جي ايجنڊا ۽ ان جي ڪم تي حمايت جي واکاڻ ڪري ٿو.
