اسلام آباد – 17 – اپريل (اي پي پي) وزيراعظم محمد شهباز شريف چيو آهي ته بلوچستان جي ترقي ۽ خوشحالي حڪومت جي اولين ترجيح آهي، برساتن کان متاثر ماڻهن جي بحالي جي لاءِ وفاقي حڪومت صوبائي حڪومت سان گڏ بيٺل آهي، بلوچستان جي معدني وسيلن مان ڀرپور فائدو کڻڻ جي لاءِ قدم کنيا پيا وڃن. وزيراعظم آفيس جي ميڊيا ونگ پاران جاري بيان موجب اهڙن خيالن جو اظهار هن بلوچستان جي وڏي وزير سرفراز بگٽي سان ڳالهائيندي ڪيو جنهن ساڻس ملاقات ڪئي. ملاقات ۾ پرڏيهي وزير اسحاق ڊار، وفاقي گهرو وزير سيد محسن رضا نقوي، واپار وارو وفاقي وزير ڄام ڪمال، پاڪستان مسلم ليگ (ن) اڳواڻ جعفر خان مندوخيل پڻ موجود هئا. وزيراعظم بلوچستان ۾ تازين برساتن سان ٿيندڙ نقصانن تي گهري ڏک جو اظهار ڪيو. هن چيو ته برساتن کان متاثر ماڻهن جي بحالي لاءِ وفاقي حڪومت صوبائي حڪومت سان گڏ بيٺل آهي. وزيراعظم چيو ته بلوچستان جي ترقي ۽ خوشحالي حڪومت جي اولين ترجيح آهي. هن چيو ته وفاقي حڪومت بلوچستان ۾ تعليم جي فروغ لاءِ صوبائي حڪومت هر ممڪن مدد ڪندي، دانش اسڪول جو دائرو بلوچستان تائين وڌايو پيو وڃي. هن چيو ته بلوچستان جي باصلاحيت افرادي قوت کي هڪ جهڙي ترقي ۽ روزگار جا موقعا فراهم ڪنداسين، بلوچستان جي معدني وسيلن مان ڀرپور فائدو کڻڻ جي ضرورت آهي ته جيئن صوبو ترقي ڪري، ان حوالي سان وفاقي حڪومت هر ممڪن قدم کڻي رهي آهي.
