واشنگٽن _26 فيبروري (اي پي پي ) آمريڪي سيڙپڪاري بينڪ گولڊ مين ساڪس ان توقع جو اظهار ڪيو آهي ته 2040ع تائين چين آمريڪا کي پوئتي ڌڪي دنيا جي وڏي معاشي طاقت بڻجي ويندو. جڏهن ته سعودي عرب دنيا جي 15 هين وڏي معيشت بڻجي ويندو . اردو نيوز مطابق گولڊ ساڪس پنهنجي تازي رپورٽ ۾ چيو ته 2040 ع ۾ سعودي عرب جي متوقع جي ڊي پي 2.4 ٽريلين ڊالر (9 ٽريلين ريال ) جڏهن ته آبادي ساڍا چار ڪروڙ تائين پهچي ويندي .رپورٽ ۾ وڌيڪ چيو ويو آهي ته 2040 ع ۾ چين آمريڪا کي پوئتي ڪري 34.1 ٽريلين ڊالر جي ڊي پي سان گڏ دنيا جي سڀ کان وڏي طاقت بڻجي ويندو. جڏهن ته آمريڪا جو جي ڊي پي ان وقت تائين 32 ٽريلين ڊالر تائين پهچي سگهي ٿو . ان کان علاوه عالمي معيشت جي اوسر واري شرح هلندڙ سال 3.1 سيڪڙو تي بروقرار رهندي جڏهن ته ايندڙ سال ان ۾ 3.2 سيڪڙو تائين مستحڪم رهندي .
