اسلام آباد – 28 – جون (اي پي پي) وفاقي ڪابينا نظرثاني حج پاليسي، قومي ويسٽ مئنيجمينٽ پاليسي ۽ افغانستان سان واپار جي فروغ جي لاءِ مختلف ڪيٽيگريز ۽ ٻين تجويزن جي منظوري ڏئي ڇڏي آهي، ڪابينا ٽانڪ ضلعي ۾ پوليو ورڪرز جي مهم تي حملي جي سخت مذمت ڪي، وزيراعظم نيشنل هيلٿ ريگيوليشنز واري وفاقي وزير کي واقعي جا تفصيل گڏ ڪرڻ ۽ وفاقي گهرو وزير کي ان جو سخت نوٽيسا وٺڻ جي هدايت ڪئي، وزيراعظم چيو ته هي هڪ سنجيده مسئلو آهي ۽ اهڙي قسم جا واقعا ٻيهر نه ٿيڻ گهرجن، وزيراعظم ان حوالي سان جاچ رپورٽ ڪابينا جي ايندڙ اجلاس ۾ پيش ڪرڻ جي هدايت ڪئي. وزيراعظم آفيس جي ميڊيا ونگ پاران جاري بيان موجب وزيراعظم شهباز شريف جي صدارت ۾ وفاقي ڪابينا جو اجلاس ٿيو. وزيراعظم سمورن وزيرن ۽ اعليٰ آفيسرن کي ڪابينا جي اجلاس ۾ ڀليڪار چئي. ڪابينا اجلاس جي شروعات پاڪستان پيپلزپارٽي پارليامينٽرين جي صدر آصف علي زرداري جي والده ۽ پرڏيهي وزير بلاول ڀٽو زرداري جي مرحومه ڏاڏيءَ جي مغفرت جي لاءِ دعا سان ڪئي وئي. سڄي ملڪ ۾ ڪورونا وائرس جي وڌندڙ ڪيسز جي ڏس ۾ وزيراعظم هدايت ڪئي ته وفاقي ڪابينا جا سمورا ميمبرز ڪوويڊ ايس او پيز تي سختي سان عمل ڪن ۽ ماسڪ جو استعمال يقيني بڻائين. وفاقي ڪابينا موسمياتي تبديلي واري وزارت جي سفارش تي قومي خطرناڪ فضلو مئنيجمينٽ پاليسي 2022ع جي منظوري ڏني. پاليسي تحت پاڪستان ۾ ڏهاڪن کان درپيش زهريلي، آتش گير ۽ حياتي کسيندڙ بيماريون پکيڙيندڙ فضلي کي تلف ڪرڻ جي مسئلي جو خاتمو ٿي سگهندو. ان کانسواءِ پاليسي پاڪستان جي توثيق ڪيل عالمي ڪنوينشنز، معاهدن ۽ ٽريٽريز جي عين موجب آهي. پاليسي لاڳو ڪرڻ جي لاءِ قومي سطح تي هڪ ڪميٽي قائم ڪئي ويندي. ان کانسواءِ فضلي تي فني ڪميٽي قائم ۽ ڪيميڪلز اينڊ ويسٽ بابت سينٽرل ڊائريڪٽوريٽ ٺاهيو ويندو. پاليسي تحت ايڪشن پلان پن جوڙيو ويندو جنهن جو مقصد وفاقي ۽ صوبائي سطح تي ڪم ڪندڙ ماحولياتي تحفظ جي ايجنسين کي وڌيڪ فعال ڪيو ويندو ۽ انهن جي نئين سر جوڙجڪ ڪئي ويندي. ڪابينا ان ڳالهه تي اتفاق ڪيو ته ٽائون پلاننگ ڪندر رهائشي ۽ صنعتي علائقا جدا جدا رکڻ گهرجن ۽ سالڊ ويسٽ مئنيجمينٽ پلان جوڙي ان کي لاڳو ڪرڻ کي يقيني بڻايو وڃي. ڪابينا ماحولياتي تهفظ ۾ سيڙپڪاري ۽ ان طرف حڪومت پاران مناسب وسيلا رکڻ تي زور ڏنو. وزيراعظم موسمياتي تبديلي واري وفاقي وزير شيري رحمان پاران ماحولياتي تحفظ جي لاءِ ڪيل ڪوششن تي ان کي ساراهيو. وزيراعظم چيو ته هو ماحولياتي تهفظ جي حوالي سان جلد ئي هڪ خصوصي اجلاس گهرائيندو جنهن ۾ صوبائي حڪومتن کي به گهرايو ويندو. ڪابينا گهرو وزارت تحت قائم افغان بين الوزارت تعاون سيل جي اپيڪس ڪميٽي ۽ نادرا، سيڙپڪاري بورڊ ۽ پرڏيهي وزارت پاران ويزا رجيم تي ريويو ڪميٽي جي اجلاس جي تجويزن جي منظوري ڏني. انهن تجويزن ۾ پاڪستاني سفارتخاني افغانين جي ويزا جي درخواست کي اصل ملڪ بدران موجوده نيشنليٽي/ پاسپورٽ جي بنياد تي پراسيس ڪندا، افغانستان سان واپار جي فروغ لاءِ ورڪ ويزا ڪيٽيگري ۾ هڪ نئين سب ڪيٽيگري/ ڊرائيورز/ ٽرانسپورٽرز/ هيلپرز جي نالي سان پاڪستان آن لائين ويزا سسٽم متعارف ڪرايو ويندو، شروعاتي طور تي 48 ڪلاڪن دوران 6 مهينن جي مدي لاءِ ملٽي پل انٽري ويزا جاري ڪئي ويندي، جنهن جي مدي ۾ هڪ سال جي توسيع جو اختيار گهرو وزارت کي هوندو. ويزا جي لاءِ گهربل دستاويزن ۾ درخواست ڪندڙ جي فوٽو، پاسپورٽ، ٽرانسپورٽ ڪمپني جي طور تي رجسٽريشن ۽ ايمپلائمينٽ ليٽر شامل هوندو جڏهن ته توسيع جي صورت ۾ انٽري/ ويزا پيج اضافي طور تي گهربل هوندو. ڊرائيورز/ ٽرانسپورٽرز ۽ هيلپرز جي ويزا جي لاءِ سيڙپڪاري بورڊ پاران سفارشي ليٽر ۽ ايس اي سي پي جي رجسٽريشن کان ڇوٽ ڏني پئي وڃي. ڇو ته ويزا حاصل ڪرڻ جو بنيادي مقصد رڳو شين جي بارڊر تي چرپر آهي. مٿي ڄاڻايل سموريون تجويزون اقتصادي رابطا تنظيم جي ميمبر ملڪن جي ڊرائيورز/ ٽرانسپورٽرز ۽ هيلپرز تي پڻ لاڳو هونديون. ڪابينا جي منظوري کانپوءِ نادرا کي پاڪستان آن لائين ويزا سسٽم جي نظام ۾ تبديلي جي هدايت ڪئي ويندي. ان سلسلي ۾ پاڪستان ۾ Ease of doing business جي فروغ لاءِ گهرو وزارت ۽ سيڙپڪاري بورڊ جي آن لائين ادائيگين کي پاڪستان آن لائين ويزا سسٽم سان ڳنڍيو ويندو. وزيراعظم وفاقي گهرو وزير کي هدايت ڪئي ته ان سلسلي ۾ جيڪي به مشڪلاتون ۽ رڪاوٽون آهن، انهن کي ختم ڪيو وڃي. اسان کي افغانستان جي ماڻهن جي مدد ڪرڻي آهي ۽ گڏيل فائدي جي لاءِ ڪم ڪرڻو آهي ته جيئن افغان شهري جيڪي سيڙڪاري جي لاءِ نار رياستن جو رخ ڪن ٿا انهن کي پاڪستان ۾ سيڙپڪاري جي لاءِ سازگار ماحول فراهم ڪيو وڃي. ڪابينا افغانستان مان ايندڙ مريضن جي لاءِ پڻ ويزا ۾ نرمي جي تجويز ڏني. ڪابينا فيصلو ڪيو ته پاڪستان ۾ افغان شهرين جي سيڙپڪاري وڌائڻ جي لاءِ پاليسي ٻن هفتن جي اندر جوڙي ويندي. ڪابينا سائنس ۽ ٽيڪنالاجي واري وزارت جي ذيلي اداري پاڪستان اسٽينڊرڊز اينڊ ڪوالٽي ڪنٽرول اٿارٽي پاران توانائي بچائڻ جي لاءِ بجلي سان هلندڙ پنکن جي لاءِ طئه ڪيل گهٽ کان گهٽ توانائي جي ڪارڪردگي جي معيارن جي حوالي سان خصوصي ڪميٽي جوڙي ڇڏي. جنهن جي سربراهي سيڙپڪاري بورڊ وارو وفاقي وزير چوڌري سالڪ حسين ڪندو جڏهن ته ٻين ميمبرن ۾ پيٽروليم وارو مملڪتي وزير ڊاڪٽر مصدق ملڪ، وفاقي وزير آغا حسن بلوچ ۽ لاڳاپيل وفاقي سيڪريٽريز هوندا. ڪابينا اتفاق ڪيو ته اسان کي توانائي بچائڻ جي ضرورت آهي ۽ ان سلسلي ۾ بجلي سان هلندڙ سمورن اوزارن جي اسٽينڊرڊز ۾ بهتري آڻڻ جي ضرورت آهي. ڪابينا اقتصادي رابطا ڪميٽي جي 22 جون 2022ع جي اجلاس ۾ ڪيل هيٺ ڏنل فيصلن جي توثيق ڪئي. جنهن ۾ ايوي ايشن ۽ ڪابينا ڊويزن جي 12 ڪروڙ 58 لک 19 هزار 29 رپين جي ضمني گرانت، اين سي او سي جي ذريعي ميڊيا پبلسٽي مهم جي لاءِ 40 ملين رپيا ادائيگي جي لاءِ ٽيڪنيڪل سپليمينٽري گرانٽ، مالي سال 2021 – 2022ع جي لاءِ پرڏيهي وزارت جي سالياني بجيٽ ۾ کوٽ کي پورو ڪرڻ جي لاءِ اضافي فنڊز جي منظوري، موجوده مالي سال 2021 – 2022ع جي دوران خصوصي مواصلاتي تنظيم (SCO) جي ٽينيڪي طور تي ضمني گرانٽ، وزيراعظم امدادي پئڪيج تحت فوت ٿيندڙ ۽ شهيد ٿيندڙن جي لاءِ 1224.41 ملين جي سپليمينٽري گرانٽ، سياسي پارٽي پاران ايندڙ احتجاج/ ڌرڻي جي دوران امن امان جي صورتحال کي برقرار رکڻ جي لاءِ ڪئميرائن جي خريداري جي لاءِ 39.363 ملين جي ضمني گرانٽ، سول آرمڊ فورسز جي سلسلي ۾ 5696.550 ملين جي باقاعده ضمني گرانٽ، غيرقانوني طور تي ڀارتي والاريل ڄمون ۽ ڪشمير جي پناهگيرن 1989ع ۽ ان کانپوءِ جي مستقل آبادڪاري جي لاءِ فني ضمني گرانٽ، فوت ٿيندڙ ملازمن جي خاندانن جي لاءِ پينشن/ مالي امدادي پئڪيج ۽ بينوولينٽ فنڊ جي لاءِ التوا هيٺ رهتن جي تصفيه جي لاءِ پاڪستان ريلوي جي ضمني گرانت، فيدرل ڊائريڪٽوريٽ آف ايمونائيزيشن جي لاءِ 6133.314 ملين جي فني گرانٽ شامل آهي.
