اسلام آباد – 29 مئي (اي پي پي) اطلاعات، نشريات ۽ قومي ورثي واري مملڪتي وزير مريم اورنگزيب چيو آهي ته ماضي جي اها روايت رهي آهي ته ناڻي واري وزير جي بجيٽ تقرير سڌوسنئون ٽيلي ڪاسٽ ڪئي ويندي آهي جڏهن ته باقي ڪارروائي جي رپورٽ رات جو ڏيکاري ويندي آهي، جيڪڏهن مخالف ڌر اڳواڻ جي تقرير سڌوسنئون ٽيلي ڪاسٽ ڪرڻ جو معاملو اڳ ۾ طئي ٿي وڃي ها ته ڪمرشل ايئر ٽائيم جو انتظام ڪيو وڃي ها، منهنجي لاءِ جيتري اهميت ناڻي واري وزير جي آهي ايتري ئي مخالف ڌر اڳواڻ جي آهي. قومي اسيمبلي ۾ مخالف ڌر اڳواڻ سيد خورشيد شاهه جي ان موقف تي ته ناڻي واري وزير جي سڌوسنئون تقرير وانگر سندس تقرير به سڌوسنئون ڏيکاري وڃي، ان جي جواب ۾ اطلاعات واري مملڪتي وزير چيو ته ماضي ۾ اها روايت رهي آهي ته رڳو ناڻي واري وزير جي بجيٽ تقرير سڌوسنئون هلندي آهي، باقي ڪا تقرير سڌوسنئون ناهي هوندي، رات جو ان جي تفصيلي رپورٽ ڏيکاري ويندي آهي.
