اسلام آباد-30 آگسٽ (اي پي پي) تعليم ۽ پيشيوراڻي تربيت واري نگران وفاقي وزير مدد علي سنڌي اسلام آباد ۾ انٽر بورڊز ڪوآرڊينيشن ڪميشن (آءِ بي سي سي) جي هيڊ آفيس جو دورو ڪيو. پنهنجي دوري دوران کيس آءِ بي سي سي جي ايگزيڪيٽو ڊائريڪٽر ڊاڪٽر غلام علي ملاح بريفنگ ڏني جنهن ۾ اداري جي اهم مينڊيٽ، ڪردار ۽ ذميوارين تي روشني وڌي وئي. بريفنگ دوران ڊاڪٽر غلام علي ملاح پاڪستان جي تعليمي شعبي ۾ آءِ بي سي سي جي تعاون تي روشني وجهندي چيو ته ملڪ جي مختلف تعليمي بورڊز ۾ امتحانن ۽ تشخص جي نظام کي معياري ۽ هموار ڪرڻ ۾ آءِ بي سي سي اهم ڪردار ادا ڪيو. هن تعليمي سرٽيفڪيٽس عالمي معيار موجب هجڻ کي يقيني بڻائڻ ۾ آءِ بي سي سي جي اهم ڪم تي روشني وڌي جيڪو شاگردن کي ملڪي ۽ عالمي سطح تي وڌيڪ تعليم حاصل ڪرڻ ۾ ڪافي سهولت فراهم ڪري ٿو. ڊاڪٽر غلام علي ملاح آءِ بي سي سي جي نون قدمن ۽ آءِ ٽي جي شعبي ۾ ڪيل سڌارن بابت پڻ آگاهه ڪيو، هن ٽيڪنالاجي کي اختيار ڪرڻ لاءِ آءِ بي سي سي طرفان کنيل ترقي پسند قدمن جي وضاحت ڪئي جنهن سبب شاگرد، تعليمي ادارن ۽ ٻين اسٽيڪ هولڊرز لاءِ خدمتن جي ڪارڪردگي ۽ پهچ ۾ بهتري آئي آهي. وفاقي وزير مدد علي سنڌي تعليمي شعبي جي معيار ۽ تاثير کي مضبوط بڻائڻ ۾ آءِ بي سي سي جي ذوق ۽ ڪوششن کي ساراهيو. هن معياري ۽ اعتبار جوڳي امتحاني سڌارن کي يقيني بڻائڻ ۾ آءِ بي سي سي جي ڪردار کي تسليم ڪيو جيڪو بعد ۾ عالمي سطح تي پاڪستاني تعليمي قابليت جي قدر کي بلند ڪن ٿا، وفاقي وزير تعليمي بهتري لاءِ آءِ بي سي سي جي مسلسل ڪوششن لاءِ پنهنجي حمايت جو اظهار ڪيو ۽ سرڪاري ادارن ۽ تعليمي ادارن وچ ۾ پائيدار تعاون جي اهميت تي زور ڀريو. وفاقي وزير ترقي پسند ۽ جامع تعليم لاءِ سازگار ماحول کي هٿي ڏيڻ لاءِ حڪومت جي عزم تي زور ڀريندي آءِ بي سي سي طرفان متعارف ڪرايل جاري قدمن ۽ سڌارن لاءِ پنهنجي حمايت جي خاطري ڪرائي.
