اسلام آباد – 22 اپريل (اي پي پي) صدر ممنون حسين چيو آهي ته انتهاپسندي کي منهن ڏيڻ جي لاءِ سياسي، معاشي ۽ معاشرتي عمل جو گهرو مطالعو لازمي آهي، ان مقصد جي لاءِ علمي ۽ تهذيبي سطح تي تحريڪ هلائڻ جي ضرورت آهي ته جيئن قومي سطح تي علمي ۽ ادبي ماحول کي وڌائي سگهجي. صدر اها ڳالهه قومي ڪتاب ميلي جو افتتاح ڪرڻ کانپوءِ هڪ خصوصي تقريب کي خطاب ڪندي چئي. ان موقعي تي صدر ڪتاب جهنڊو پڻ ڦڙڪايو. مقامي اسڪولن جي شاگردن ڪتاب جو قومي نغمو ڪتابن جي دنيا سلامت رهي پيش ڪيو.
