پاڪستان آٽو انڊسٽري جو مستقبل هڪجهڙي لوڪلائيزيشن ۽ اليڪٽرڪ موبيلٽي سان واڳيل آهي: راڻا احسان افضل خان

اسلام آباد- 21 سيپٽمبر (اي پي پي) وزيراعظم جي واپار ۽ صنعت بابت ڪوآرڊينيٽر راڻا احسان افضل خان چيو آهي، ته پاڪستان جي آٽو موبائيل صنعت جو مستقبل هڪجهڙي لوڪلائيزيشن، جديد ٽيڪنالاجي ۽ اليڪٽرڪ موبيلٽي ۾ اشارو آهي. انهن خيالن جو اظهار هن پاڪستان انٽرنيشنل آٽو شو 2026ع جي ٻئي ڏينهن لاهور انٽرنيشنل ايڪسپو سينٽر ۾ پاڪستان ايسوسيئيشن آف آٽوموٽيو پارٽس اينڊ ايسيسريز مينيوفيڪچرنگ جي انتظام هيٺ منعقد سمپوزيم ۾ خاص مهمان طور خطاب ڪندي ڪيو. سمپوزيم جو موضوع ”برابر – لوڪلائيزيشن ۽ اليڪٽرڪ موبيلٽي“ هو. پنهنجي خطاب کان اڳ هن ملڪي ۽ عالمي ڪمپنين جي اسٽالزن ۽ پويلينز جو دورو به ڪيو. هن گاڏيون تيار ڪندڙ مختلف ڪمپنين، خاص ڪري اڀرندڙ اليڪٽرڪ وهيڪل مينيوفيڪچررز جي نمائندن سان ملاقاتون به ڪيون ۽ پاڪستان جي آٽوموبائيل صنعت جي ترقي ۾ ان جي ڪردار جي تعريف ڪئي. سمپوزيم کي خطاب ڪندي هن چيو ته آٽو سيڪٽر ۾ لوڪلائيزيشن جو عمل رڳو مقامي پيداوار تائين محدود نه هئڻ گهرجي پر ان کي عالمي ۽ مقامي سطح تي برابري، بهتر معيار، اعتماد جوڳي مصنوعات ۽ صارفين کي وڌيڪ چونڊ فراهم ڪرڻ جي هدفن سان هم آهنگ ڪرڻ هوندو. هن چيو ته پاڪستان ۾ تيار ٿيندڙ هر گاڏي پٺيان پرزه ٺاهيندڙ، انجنيئرز، فني ماهر ۽ ڪارڪنن تي ٻڌل هڪ وسيع سپلاءِ چين موجود آهي. آٽوموبائيل سيڪٽر قومي مجموعي پيداوار ۾ اٽڪل 4 سيڪڙو حصو وجهي ٿو ۽ لکين پاڪستانين کي روزگار فراهم ڪري رهيو آهي. هن چيو ته ڏکين معاشي حالتن باوجود آٽو انڊسٽري جي ترقي، استقامت ۽ ڪارڪردگي ذڪر جوڳي آهي، وقت اچي ويو آهي ته صنعتي مستقبل جي ضرورتن کي نظر ۾ رکندي جديد ٽيڪنالاجي، جدت ۽ خاص اليڪٽرڪ گاڏين جي تياري طرف تيزي سان اڳڀرائي ڪجي. هن ان عزم جو ورجاءُ ڪيو ته حڪومت سيڙپڪاري ۽ صنعتي ترقي لاءِ سازگار ماحول جي فراهمي سان اهڙيون پاليسيون جاري رکندي جيڪي جامع، مستقل، شفاف ۽ سمورن اسٽيڪ هولڊرز لاءِ منصفاڻو هجن.