اسلام آباد-28 آگسٽ (اي پي پي) مذهبي معاملن واري وزارت سرڪاري اسڪيم جي سمورن هڪ لک 18 هزار 60 حج 2026ع جي درخواست گذارن کي هدايت ڪئي آهي ته هو پاڪ حج موبائل ايپ 2026ع لازمي ڊائون لوڊ ڪن، ان ئي ذريعي کين هر قسم جون هدايتون ۽ معلومات فراهم ڪيون وينديون. مذهبي معاملن واري وزارت جي ترجمان عمر بٽ اي پي پي سان ڳالهائيندي ٻڌايو ته سرڪاري اسڪيم تحت هلندڙ سال هڪ لک 18 هزار 60 درخواستون مليون آهن، اهي سمورا درخواست گذار حج موبائل ايپ 2026ع ڊائون لوڊ ڪن، ان ئي ذريعي کين حج ٽريننگ، ويڪسينيشن سميت هر قسم جي معلومات فراهم ڪئي ويندي. ان ئي ايپ ذريعي هو پنهنجي ڊيٽا جي وزارت مان تصحيع به ڪرائي سگهن ٿا ۽ جيڪڏهن سندن ذهن ۾ حج 2026ع جي حوالي سان ڪو سوال اچي ٿو ته اهي وزارت کان ان جو جواب به وٺي سگهن ٿا. هڪ سوال جي جواب ۾ هن چيو ته پهرين نومبر کان حج خرچن جي ٻئين قسط جي وصولي شروع ڪئي ويندي، حج پيڪيج تحت ڪو به درخوست گذار پرائيوٽ قرباني جو آپشن استعمال نٿو ڪري سگهي، کين لازمي طور تي سعودي عرب جي مقرر ڪيل بئنڪن ذريعي قرباني ڪرڻي پوندي جنهن لاءِ ان سلسلي ۾ حج خرچن جو جيڪو اندازو کين ڏنو ويو آهي انهن ۾ قرباني جي رقم شامل آهي. هن چيو ته پرائيويٽ اسڪيم تحت حج جي خواهشمند ماڻهن کي چيو ويو آهي ته اهي مستند حج ڪمپنين سان ئي رابطو ڪن جن جي لسٽ مذهبي معاملن واري وزارت جي ويب سائٽ تي دستياب هوندي. هن چيو ته اختياري سهولتون رڳو مڪي شريف لاءِ هونديون اهي به دستيابي جي شرط تي فراهم ڪيون وينديون، انهن خرچن جي وصولي ٻئين قسط سان ٿيندي. عمره زائرين جي حوالي سان هن چيو ته اهي مذهبي معاملن واري وزارت جي تصديق ٿيل ڪمپنين مان ئي بڪنگ ڪرائن، ڪمپني سان طئي ٿيل سهولتن جو لکت ۾ معاهدو ڪن ۽ انهن کي ادائگي رڳو بئنڪنگ چينل ذريعي ڪمپني اڪائونٽ ۾ ئي ڪن. وزارت مان تصديق ٿيل ڪمپنين جي لسٽ وزارت جي ويب سائٽ تي اپ لوڊ ڪئي وئي آهي.
