اسلام آباد-16 جولاءِ (اي پي پي) پاڪستاني فضائي ڪمپنين تي برطانوي پابندين جي خاتمي کانپوءِ پاڪستان انٽرنيشنل ايئر لائن (پي آءِ اي) هڪ دفعو ٻيهر برطانيه جي فضائن ۾ اڏام ڀرڻ لاءِ پرعزم آهي، برطانوي پابندين جو خاتمو پي آءِ اي جي فضائي حفاظت جي معيار ۽ وزيراعظم شهباز شريف ۽ سندس ٽيم جي ڪوششن جو ثمر آهي. پي آءِ اي ترجمان عبدالله حفيظ خان پاڪستاني فضائي ڪمپنين تي برطانوي پابندين جي خاتمي جي موقعي تي جاري پڌرائي ۾ چيو آهي ته برطانوي ايئر سيفٽي ڪميٽي طرفان پابندي جو خاتمو هوابازي جي عالمي حفاظتي معيارن تي سختي سان ڪاربند رهڻ سان ممڪن ٿيو آهي. پي آءِ اي گهٽ وقت ۾ برطانيه لاءِ اڏامون هلائڻ جي تياري مڪمل ڪري رهي آهي ۽ ان ڏس ۾ شيڊول فائنل ڪيو پيو وڃي. ترجمان چيو ته برطانوي آپريشن جو باضابطه آغاز اسلام آباد کان مانچسٽر جي اڏامن سان ٿيندو، شيڊول جي منظوري ملندي ئي شروعاتي طور تي هفتيوار 3 اڏامون هلايون وينديون. ترجمان چيو ته پي آءِ اي انتظاميه وزيراعظم شهباز شريف، نائب وزيراعظم اسحاق ڊار، دفاع واري وزير خواجه محمد آضف، دفاع واري وزارت جي عملدارن، برطانوي هاءِ ڪمشنر جين ميريٽ، سول ايوي ايشن اٿارٽي ۽ لاڳاپيل ادارن جي خصوصي طور تي ٿورائتي آهي جن جي ذاتي ڪوششن سان پابندي جو خاتمو ممڪن ٿيو.
