واشنگٽن – 09 جولاءِ (اي پي پي) آمريڪي رياست ٽيڪساس جي ڏکڻ اوڀر سمنڊ ڪناري وارن علائقن ۾ سامونڊي طوفان بيرل سبب گهٽ ۾ گهٽ 3 ڄڻا فوت ۽ وڏي پيماني تي تباهي ٿي آهي. طوفان جي اثر هيٺ هلڻ واري تيز هوائن ۽ تيز برسات سبب هاءِ ويز جا ڪيترائي هنڌ پاڻي هيٺ اچي ويا، تيل جي فراهمي لاءِ استعمال ٿيندڙ بندرگاهون بند ڪيون ويون، 1300 کان وڌيڪ اڏامون ،ملتوي ۽ 27 لک کان وڌيڪ گهرن ۽ ڪاروباري هنڌن کي بجلي جي فراهمي معطل ٿي وئي. آمريڪي نيشنل هريڪين سينٽر مطابق طوفان بيرل جي شدت ۾ هڪ ڀيرو ٻيهر اضافي سبب ڪيٽيگري 5 جي سامونڊي طوفان ۾ تبديل ٿيڻ بعد ميٽا گورڊا ۽ ٽيڪساس جي ٻين سامونڊي علائقن سان ٽڪرائجي ويو آهي جڏهن ته هيوسٽن تائين پهچڻ کان اڳ ان جي شدت ۾ گهٽتائي اچي وئي. بيرل ٽيڪساس پهچڻ کان اڳ ميڪسيڪو ۽ ڪيريبين ۾ به تباهي مچائي ڇڏي جتي طوفان سبب گهٽ ۾ گهٽ 11 ڄڻا فوت ٿي ويا آهن.
