پي ايس ايل ۾ 2 نئين ٽيمن جي شموليت سان گراس روٽ جي سطح تي ڪرڪيٽ جي فروغ ۽ نئين ٽيلنٽ کي اڀرڻ ۾ مدد ملندي: وزيراعظم شهباز شريف

اسلام آباد – 09 جنوري (اي پي پي) وزيراعظم محمد شهباز شريف چيو آهي ته پي ايس ايل ۾ 2 نئين ٽيمن جي شموليت سان گراس روٽ جي سطح تي ڪرڪيٽ جي فروغ ۽ نئين ٽيلنٽ کي اڀرڻ ۾ مدد ملندي، اها ڳالهه خوش آئنده آهي ته بڊنگ جي لاءِ عالمي فرمز سامهون آيا، ان عمل سان پاڪستان ۾ ٻاهرئين سيڙپڪاري کي فروغ مليو، سمنڊ پار پاڪستانين سدائين ملڪي ترقي ۾ اهم ڪردار ادا ڪيو آهي. وزيراعظم آفيس جي ميڊيا ونگ پاران جاري بيان موجب وزيراعظم محمد شهباز شريف سان پاڪستان ۾ سپر ليگ ۾ 2 نئين ٽيمن جي بڊنگ کٽيندڙ فرمز جي نمائندن ملاقات ڪئي. نمائندن ۾ ٽيم سيالڪوٽ حاصل ڪندڙ فرم ”او – زيڊ ڊيولپر“ جو حمزه مجيد ۽ ٽيم حيدرآباد حاصل ڪندڙ فرم ”ايف ڪي ايس“ جو فواد سرور شامل هئا. ملاقات ۾ وفاقي گهرو وزير محسن نقوي ۽ اطلاعات ۽ نشريات وارو وفاقي وزير عطاءُ الله تارڙ پڻ موجود هئا. وزيراعظم ٽيم سيالڪوٽ ۽ ٽيم حيدرآباد جي نمائندن کي مبارڪباد ڏني ۽ انهن جي لاءِ نيڪ خواهشن جو اظهار ڪيو. وزيراعظم ڪامياب بڊنگ جي عمل تي پاڪستان ڪرڪيٽ بورڊ جي چيئرمين سيد محسن رضا نقوي ۽ پي سي بي مئنيجمينٽ کي خراج تحسين پيش ڪيو. وزيراعظم چيو ته پي ايس ايل جي نئين ٽيمن جي لاءِ ٻولي جو عمل ٽيليويزن تي سڌوسنئون نشر ڪيو ويو جيڪو ان جي شفافيت جو واضح ثبوت آهي، ٻن نئين ٽيمن جي شموليت سان گراس روٽ جي سطح تي ڪرڪيٽ جي فروغ ۽ نئين ٽيلنٽ کي اڀرڻ ۾ مدد ملندي، اهي ٻه نيون ٽيمون پي ايس ايل جي لاءِ تازي هوا جو هڪ جهونڪو ثابت ٿينديون. وزيراعظم چيو ته اها ڳالهه انتهائي خوش آئنده آهي ته انهن ٻن ٽيمن جي بڊنگ جي لاءِ عالمي فرمز سامهون آيا، ان عمل سان پاڪستان ۾ ٻاهرئين سيڙپڪاري کي فروغ مليو، سمنڊ پار پاڪستاني سدائين کان ملڪي ترقي ۾ اهم ڪردار ادا ڪندا آيا آهن، پي ايس ايل جي نئين ٽيمن جي بڊنگ جي عمل ۾ جهڙي طرح سان ملڪي ۽ عالمي فرمز دلچسپي ڏيکاري ان سان عالمي سطح تي پي ايس ايل جي مقبوليت جو اندازو لڳائي سگهجي ٿو.