ڄمون ۽ ڪشمير تڪرار تي پاڪستان جي اصولي موقف ۽ ڪشميري عوام جي خودمختياري جي حق جي مسلسل حمايت تي او آءِ سي جا ٿورائتا آهيُون: پاڪستان

اسلام آباد – 31 آڪٽوبر (اي پي پي) پاڪستان ڄمون ۽ ڪشمير تڪرار تي پاڪستان جي اصولي موقف ۽ ڪشميري عوام جي خودمختياري جي حق جي مسلسل حمايت تي اسلامي تعاون تنظيم (او آءِ سي) جا ٿورا ادا ڪيا آهن. پرڏيهي آفيس جي ترجمان طاهر حسين اندرابي پريس بريفنگ ۾ چيو ته اسان ڀارت جي غيرقانوني طور تي قبضي هيٺ ڄمون ۽ ڪشمير ۾ 78 سالن جي قبضي، رياستي دهشتگردي ۽ انساني حقن جي خلاف ورزين جي مذمت ڪريون ٿا ۽ گڏيل قومن جي سلامتي ڪائونسل جي قراردادن تحت خودمختياري جو حق حاصل ڪرڻ جي لاءِ پنهنجي منصفاڻي جدوجهد ۾ ڏهاڪن کان مصيبتون برداشت ڪندڙ ڪشميري عوام جي اخلاقي، سفارتي ۽ سياسي حمايت جو ورجاءُ ڪريون ٿا. هن چيو ته پاڪستان 27 آڪٽوبر تي ڪشمير تي ڀارتي قبضي جا 78 سال مڪمل ٿيڻ جي ڏينهن ڪارو ڏينهن ملهايو. هن 27 آڪٽوبر 1947ع تي ڀارتي فوج جي ڪاررواين جو ذڪر ڪيو جيڪي ڄمون ۽ ڪشمير تي غيرقانوني قبضي جو سبب بڻيون. ترجمان او آءِ سي پاران ڄمون ۽ ڪشمير تڪرار تي پاڪستان جي اصولي موقف ۽ ڪشميري عوام جي خودمختياري جي حق جي مسلسل حمايت تي ٿورا مڃيا. هن چيو ته ڪاري ڏينهن جي موقعي تي سيمينارز، پينل ڊسڪشنز ۽ تصويري نمائشن سميت وسيع پئماني تي سرگرميون سڄي ملڪ ۽ ٻاهرئين ملڪ پاڪستاني مشنز پاران منعقد ڪيون ويون جن ۾ ڀارتي قابض فوج جي منظم ظلم ۽ ڏاڍ کي منهن ڏيندڙ معصوم ڪشميرين جي خراب حالت کي اجاگر ڪيو ويو. هن چيو ته ان موقعي تي پنهنجي خصوصي پيغامن ۾ صدر، وزيراعظم ۽ نائب وزيراعظم ڪشميري عوام جي منصفاڻي جدوجهد ۾ انهن جي اخلاقي، سفارتي ۽ سياسي حمايت جاري رکڻ جي پاڪستان جي عزم جو ورجاءُ ڪيو. هن عالمي برادري تي زور ڏنو ته اها ڄمون ۽ ڪشمير تي غيرقانوني قبضو ختم ڪرڻ، انساني حقن جي سنگين خلاف ورزين کي روڪڻ ۽ ڪشميرين جي خلاف سمورا جابراڻا قدم بند ڪرڻ جي لاءِ ڀارت تي دٻاءُ وجهڻ جي لاءِ پنهنجو ڪردار ادا ڪري. ترجمان چيو ته نائب وزيراعظم ۽ پرڏيهي وزير گڏيل قومن جي جنرل اسيمبلي جي صدر، سلامتي ڪائونسل جي صدر، گڏيل قومن جي سيڪريٽري جنرل، انساني حقن بابت هاءِ ڪمشنر ۽ او آءِ سي جي سيڪريٽري جنرل کي خط پڻ لکي انهن کي ڀارت جي غيرقانوني قبضي هيٺ ڄمون ۽ ڪشمير ۾ انساني حقن جي سنگين صورتحال کان آگاهه ڪيو. هن چيو ته پرڏيهي وزارت پاران خصوصي ڪشميري يڪجهتي واڪ جو اهتمام ڪيو ويو ۽ اسلام آباد ۾ سفارتي ڪور جي ميمبرن جي لاءِ خصوصي بريفنگ منعقد ڪئي وئي. ترجمان چيو ته 27 آڪٽوبر کي ڪاري ڏينهن جي طور تي ملهائڻ ڄمون ۽ ڪشمير تي ڀارت جي غيرقانوني قبضي جي ياد ڏيارڻ آهي، اهو ڪشميري عوام جي ريزيلينس کي خراج تحسين پيش ڪرڻ جو هڪ موقعو به آهي جيڪو ڪيترن ئي ڏهاڪن کان ڏاڍ جي باوجود خودمختياري جي حق جي لاءِ پنهنجي جدوجهد ۾ ثابت قدم آهن.