ٽنڊو محمد خان-06 آگسٽ (اي پي پي) پاڪستان پيپلز پارٽي جي اڳوڻي ايم پي اي محمد نواز چانڊيو چيو آهي ته عوام جي سهولت لاءِ هر ممڪن ڪوشش ڪري رهيا آهيون. ٽنڊو محمد خان ضلعي ۾ هڪ ٻي چوپائي مال جي پڙي قائم ڪئي پئي وڃي ته جيئن ماڻهو وڌ کان وڌ فائدو کڻي سگهن. اهڙو اظهار هن ٽنڊو محمد خان جي علائقي متارو ويجهو هر اربع ڏينهن لڳندڙ چوپائي مال جي پڙي جي افتتاح کان پوءِ ”اي پي پي“ سان ڳالهائڻ دوران ڪيو. محمد نواز چانڊيو چيو ته واپارين جي خريد ۽ وِڪري ۾ آسانيءَ لاءِ ٽنڊو محمد خان ۾ باقاعده طور هڪ ٻي چوپائي مال جي نئين پڙي جي شروعات ڪئي وئي آهي. ٽنڊو محمد خان ضلعي جي حدن ۾ هفتيوار بنياد تي ڇنڇر تي تلهار چوپايو مال پڙي، آچر تي ٽنڊو سائينداد چوپايو مال پڙي ۽ هر اربع ڏينهن متارو چوپايو مال پڙي لڳندي جتي ڏورانهن علائقن جا واپاري ننڍو ۽ وڏو چوپايو مال خريد ۽ وڪرو ڪندا. ان موقعي تي ٽائون ڪميٽي ٽنڊو غلام حيدر جو چيئرمين سردار امير سلطان چانڊيو، رئيس عنايت چانڊيو، نانا حاجي مبارڪ، ڊاڪٽر سجاد چانڊيو سميت مختلف يونين ڪائونسلن جي چيئرمينز وائيس چيئرمينز سميت عوام جي وڏي انگ شرڪت ڪئي.
