بيجنگ -17 اپريل (اي پي پي) چين جي دفاع واري وزير ڊونگ جون چيو آهي، ته تائيوان جي معاملي تي چين جي بنيادي مفادن جي ڀڃڪڙي نه ٿيڻ گهرجي. تاس موجب چين جي دفاع واري وزير آمريڪي دفاع واري وزير لائيڊ آسٽن سان ٽيليفون تي ڳالهائيندي چيو ته تائيوان جو مسئلو چين لاءِ بنيادي مسئلن مان هڪ آهي ۽ چين جي بنيادي مفادن جي ڀڃڪڙي نه ٿيڻ گهرجي. ڊونگ جون چيو ته پيپلز لبريشن آرمي تائيوان جي آزادي، غير ملڪي حوصلا افزائي يا عليحدگي پسند سرگرمين جي ڪنهن به نمائش کي برداشت نه ڪيو ويندو. واضح رهي ته اپريل جي شروعات ۾ چين جي اڳواڻ شي جن پنگ ۽ آمريڪي صدر جوبائيڊن وچ ۾ ٽيليفون تي ڳالهه ٻولهه ٿي هئي. شي جن پنگ نشاندهي ڪئي هئي ته تائيوان جو مسئلو چين آمريڪا ناتن ۾ پهرين ڳاڙهي لڪير آهي. جيڪا پار نه ڪرڻ گهرجي.
