بيجنگ_ 27 سيپٽمبر(اي پي پي) چين باضابطا طور تي سعودي عرب کي اهم ترين سياحتي ملڪ جو درجو ڏئي ڇڏيو آهي، ميڊيا رپورٽن موجب سعودي عرب جي سياحت واري وزير احمد الخطيب ميڊيا کي ٻڌايو ته چين ۾ سعودي سفير، سعودي ٽورازم اٿارٽي جي سي اي او ۽ چين جي سياحت جي نائب وزير جي موجودگي ۾ ٻنهي ملڪن جي نمائندن هڪ معاهدي تي صحيح ڪيون، جنهن جي موجب سالياني 30 لک چيني سياح سعودي عرب ايندا، هن ٻڌايو ته ان معاهدي سان ٻنهي ملڪن وچ ۾ رابطي کي هٿي ملندي ۽ سياحت جي شعبي ۾ موقعا پيدا ٿيندا ۽ سياحت ، ڪاروبار ،سيڙپڪاري ۽ جديد ٽيڪنالوجي جي شعبن ۾ ٻنهي ملڪن جا لڳاپا مستحڪم آهن. ان موقعي تي چين جي سياحت جي نائب وزير چيو ته اهو معاهدو ٻنهي ملڪن وچ ۾ ڪيترن ئي ڏهاڪن کان جاري لڳاپن کي اڳيان وڌائڻ واري سلسلي جو هڪ اهم قدم آهي ۽ ان سان سعودي ۽ چين وچ ۾ مختلف سطحن تي لڳاپا وڌيڪ مضبوط ٿيندا.
