ڪراچيءَ جي ميئر پاران ملير ضلعي ۾ ميمڻ ڳوٺ روڊ بحالي منصوبي جو افتتاح

ڪراچي-28 آگسٽ (اي پي پي)ڪراچيءَ جي ميئر بيرسٽر مرتضيٰ وهاب ضلعي ملير ۾ 23 ڪروڙ 33 لک رپين کان وڌيڪ جي لاڳت سان مڪمل ٿيل ميمڻ ڳوٺ روڊ بحالي منصوبي جو افتتاح ڪري ڇڏيو. ان موقعي تي ڊپٽي ميئر ڪراچي سلمان عبدالله مراد، سٽي ڪائونسل جا ميمبر، چونڊيل نمائندا ۽ ٻيا پڻ موجود هئا.ميئر ڪراچي بيرسٽر مرتضيٰ وهاب چيو ته ميمڻ ڳوٺ روڊ بحالي منصوبي جي مجموعي ڊيگهه 8529 رننگ ميٽر آهي ۽ روڊ جي ٻنهي پاسن تي بحالي ۽ تعميراتي ڪم ڪيا ويا آهن. منصوبي تحت روڊ جي ويڪر ۾ سراسري طور 2 ميٽر تائين واڌ ڪئي وئي، جڏهن ته ٻنهي پاسن تي سراسري طور 1.2 ميٽر ويڪرا شولڊر پڻ تعمير ڪيا ويا آهن.هن چيو ته منصوبي تحت 35 هزار 437 چورس ميٽر ايراضي تي اسفالٽڪ وئيرنگ ڪورس وڇايو ويو، جڏهن ته 3 هزار چورس ميٽر ايراضي تي 80 ملي ميٽر ٿلها پيورز لڳايا ويا ۽ شولڊرز تي 17 هزار چورس ميٽر ايراضي ۾ 60 ملي ميٽر ٿلها پيورز لڳايا ويا آهن. ٽريفڪ جي رواني ۽ رهنمائي لاءِ 150 ملي ميٽر ويڪري پيلي ۽ اڇي لين مارڪنگ ڪئي وئي، جڏهن ته ضرورت موجب ڪيٽ آئيز پڻ نصب ڪيون ويون آهن.تقريب کي خطاب ڪندي ميئر ڪراچي بيرسٽر مرتضيٰ وهاب چيو ته روڊن جي تعمير کان اڳ ٽريفڪ، سيوريج ۽ بيس جا سمورا ضروري ڪم مڪمل ڪيا ويا آهن. مڪران روڊ تي ڪجهه روڊن جي تعمير ۽ بحالي جو ڪم شروع ڪيو ويو آهي، جڏهن ته ٻين روڊن لاءِ ٽينڊرنگ جو عمل جاري آهي. هلندڙ سال جي آخر تائين مڪران روڊ جي سموري علائقي ۾ ترقياتي ڪم مڪمل ڪيا ويندا.هن چيو ته ملير جي ساوڪ، فصلون ۽ ڳوٺاڻي ثقافت ڪراچي جي مثبت سڃاڻپ جي عڪاسي ڪن ٿيون. اسان جو مقصد شهر جي مختلف علائقن کي هڪ ٻئي سان ڳنڍڻ ۽ انهن جي وچ ۾ رابطي کي وڌيڪ بهتر بڻائڻ آهي.هن چيو ته شاهراهه جي بهتري سبب شهر کان ملير تائين سفر جو وقت گهٽجي 15 کان 20 منٽ رهجي ويو آهي. ايئرپورٽ کان چيڪ پوسٽ تائين ڊوئل ڪيريج وي منصوبي تي پڻ ڪم جاري آهي. اهو منصوبو ڪاٺوڙ ۽ ايئرپورٽ جي پٺئين حصي کي موٽروي سان ڳنڍيندو.هن ٻڌايو ته ايئرپورٽ بئڪ سائڊ روڊ منصوبو آڪٽوبر جي وچ تائين مڪمل ڪري عوام لاءِ کوليو ويندو، جنهن سان شهرين کي اچ وڃ ۾ وڌيڪ سهولت حاصل ٿيندي.ميئر ڪراچي چيو ته پنج سئو سال پراڻي چوڪنڊي قبرستان ۾ ميوزيم تعمير ڪيو پيو وڃي، ان سلسلي ۾ صوبائي وزير ثقافت ۽ سياحت سان رابطي ۾ آهيون. چوڪنڊي قبرستان صوبائي وزير ثقافت ۽ سياحت جي ڪنٽرول ۾ آهي، جڏهن ته ميوزيم جي قيام لاءِ مالي مدد پڻ ڪئي وئي آهي.هن چيو ته ميوزيم ذريعي ٻارن ۽ نوجوانن کي ڪراچي ۽ ملير جي قديم تاريخ، تهذيب ۽ ثقافت بابت آگاهي ڏني ويندي. شهر جي مختلف علائقن ۾ پاڪستان پيپلز پارٽي پاران تاريخي ۽ ثقافتي منصوبن تي پڻ ڪم جاري آهي.ميڊيا نمائندن جي سوالن جا جواب ڏيندي ميئر ڪراچي بيرسٽر مرتضيٰ وهاب چيو ته ڪراچي جو عوام پنهنجو ڪيس وڙهائڻ بدران دليل، شائستگي ۽ احترام سان پيش ڪري ٿو ۽ مهذب انداز ۾ پنهنجو مؤقف پيش ڪرڻ سان ئي ڪراچي جو ڪيس ڪامياب ٿي سگهي ٿو. ڪنهن هڪ شخص کي حڪومت کان وڌيڪ طاقتور هجڻ جو تاثر ختم ڪرڻ لاءِ جيڪو به ذميوار هجي، ان خلاف ڪارروائي ضروري آهي.هن چيو ته بينر ۽ پلي ڪارڊ کڻي احتجاج ڪرڻ بدران ويهي مسئلا حل ڪرڻ گهرجن. احتجاج جي اشاري سان اختلاف آهي، تنهن هوندي به مسئلن جي حل لاءِ ضروري قدم کنيا ويندا.هن چيو ته ايم ڪيو ايم وارا تعصب جي سياست ڪن ٿا، جڏهن ته اسان خدمت ۽ ڪم جي سياست ڪري رهيا آهيون. اسان شهرين جا مسئلا هر سطح تي اٿاري رهيا آهيون ۽ انهن جي حل لاءِ مسلسل ڪم ڪري رهيا آهيون. سنڌ حڪومت پڻ عوامي مسئلن جي حل ۽ شهرين جي خدمت لاءِ عملي قدم کڻي رهي آهي.هن چيو ته مختلف علائقن ۾ مختلف مؤقف اختيار ڪرڻ ٻٽو معيار آهي. نفرتون ورهائي ترقي ممڪن ناهي. ملڪ جي ترقي لاءِ نفرتن بدران ماڻهن جي دلين کي ڳنڍڻو پوندو.