اسلام آباد – 02 مارچ (اي پي پي) پرڏيهي وزير شاهه محمود قريشي چيو آهي ته چيئرمين مائو زي تنگ ۽ وزيراعظم چوان لائي پاڪ چين لاڳاپن کي مضبوط بڻائڻ ۾ تاريخي ڪردار ادا ڪيو، پاڪ چين لاڳاپا خطي ۾ امن ۽ استحڪام جا ضامن آهن، چين پاڪستان جي اهم اسٽريٽجڪ، معاشي ۽ ترقياتي ترجيحن جي معاملن ۾ اسان جي مدد ڪئي، قومي ترقي جي لاءِ سي پيڪ جي لازمي هجڻ تي پاڪستان ۾ مڪمل سياسي اتفاق راءِ آهي. اها ڳالهه هن پاڪ چين لازوال دوستي جي 70 سالا جشن جي حوالي سان هڪ ئي وقت پرڏيهي وزارت پاڪستان ۽ پرڏيهي وزارت چين ۾ منعقد افتتاحي تقريب کي خطاب ڪندي ڪئي. پرڏيهي وزير شاهه محمود قريشي ۽ چيني پرڏيهي وزير وانگ زي (وڊيو لنڪ ذريعي) تقريب ۾ شرڪت ڪئي. پرڏيهي وزير چيو ته 21 مئي 1951ع تي شروع ٿيندڙ ٻطرفن پاڪ چين مثالي لاڳاپن کي 2021ع ۾ 70 سال مڪمل ٿيڻ وارا آهن. ان سلسلي ۾ ٻئي ملڪ ان لازوال دوستي جي 70 سالا جشن جي حوالي سان مختلف تقريبون منعقد ڪندا رهندا. شاهه محمود قريشي چيو ته منهنجي لاءِ انتهائي خوشي جي ڳالهه آهي ته آئون چيني پرڏيهي وزير وانگ زي سان گڏ پاڪ چين لازوال دوستي جي 70 سالا جشن جو افتتاح ڪري رهيو آهيان. گذريل 70 سالن ۾ پاڪ چين لاڳاپا، وسيع البنياد ڊگهي مدي، سدا بهار اسٽريجڪ حصيداري ۾ تبديل ٿيا. هن چيو ته پاڪ چين لاڳاپا خطي ۾ امن ۽ استحڪام جا ضامن آهن، اسان کي خوشي آهي ته پاڪستان انهن اولين ملڪن ۾ شامل آهي جن سڀ کان اڳ چين جي رياست کي تسليم ڪيو. چين پنهنجي محنت جي زور تي سماجي ۽ اقتصادي ترقي جون ڪيتريون ئي اهم منزلون طئي ڪيون آهن، اڄ چين دنيا جي ٻي وڏي اقتصادي قوت هجڻ سان گڏوگڏ عالمي واپار ۽ آرٽيفيشل انٽيليجنس ۾ پنهنجو پاڻ کي مڃرائي چڪو آهي.
