پرنسپل انفارميشن آفيسر رئيسه عادل پاران آزادي جي ڏهاڙي جي موقعي تي قوم کي دلي مبارڪباد، شهيدن ۽ بزرگن کي خراج عقيدت پيش

اسلام آباد – 14 آگسٽ (اي پي پي) پرنسپل انفارميشن آفيسر رئيسه عادل آزادي جي ڏهاڙي جي موقعي تي پنهنجي پيغام ۾ قوم کي دلي مبارڪباد پيش ڪئي ۽ شهيدن ۽ بزرگن کي خراج عقيدت پيش ڪيو جن جي قربانين پاڪستان جي آزادي، سلامتي ۽ خودمختياري جو بنياد رکيو. پاڪستان جي آزادي جي ڏهاڙي جي موقعي تي پنهنجي خصوصي پيغام ۾ هن چيو ته آزادي جو ڏهاڙو پاڪستانين جي بانين، شهيدن ۽ ملڪ جي تعمير ۽ سلامتي جي لاءِ جدوجهد ڪندڙ بزرگن جي نسلن جي بي پناهه قربانين جي ياد ڏياري. هن چيو ته اڄ اسان انهن سمورن شهيدن ۽ بزرگن کي سلام پيش ڪريون ٿا جن ملڪ ۽ ان جي سلامتي جي لاءِ پنهنجون جانيون قربان ڪيون، انهن جي قربانين جي ڪري ئي اسان پاڪستان ۾ آزاد شهري جي حيثيت سان زندگي گذاري رهيا آهيون. رئيسه عادل چيو ته پاڪستان عالمي برادري ۾ پنهنجي پوزيشن ۽ سڃاڻپ کي مستحڪم ڪري رهيو آهي ۽ نئين اعتماد ۽ اميد سان دنيا جي نقشي تي اڀري رهيو آهي. هن چيو ته پاڪستان تڪرارن کي وڌڻ کان روڪڻ جي سفارتي ڪوششن جي ذريعي علائقائي ۽ عالمي امن کي فروغ ڏيڻ ۾ تعميري ڪردار ادا ڪيو آهي. تازن واقعن دوران عالمي صحافين جي پاڪستان جي دورن جو حوالو ڏيندي پي آءِ او چيو ته هنن ملڪ جي پرامن ماحول، ثقافت، هم آهنگي ۽ مهمان نوازي جو مشاهدو ڪيو ۽ پاڪستان جو مثبت تاثر کڻي پنهنجي وطن واپس ويا. پرنسپل انفارميشن آفيسر چيو ته پاڪستان جي ترڪيه ۽ سعودي عرب سان امن ۽ تعاون جي حمايت هڪ ٻي اهم اڳڀرائي آهي جيڪا مسلم دنيا ۾ ملڪ جي ڪردار ۽ موقف کي وڌيڪ مضبوط ڪندي. هن قوم تي زور ڀريو ته اها پنهنجي بزرگن جي قربانين کي ياد ڪندي آزادي جي ڏهاڙي کي فخر سان ملهائي جن آزادي کي ممڪن بڻايو ۽ هڪ پرامن، خوشحال ۽ مضبوط پاڪستان جي تعمير جي عزم جو ورجاءُ ڪيو. هن چيو ته پاڪستان هڪ خواب جي تڪميل آهي ۽ اهو سفر جاري آهي. پاڪستان جو مستقبل روشن آهي. پاڪستان سدائين مضبوط ۽ خوشحال رهندو.