نائب وزيراعظم ۽ پرڏيهي وزير سينيٽر محمد اسحاق ڊار جي گڏيل عرب امارات جي هم منصب سان ٽيليفون تي ڳالهه ٻولهه

اسلام آباد – 24 مارچ (اي پي پي) نائب وزيراعظم ۽ پرڏيهي وزير سينيٽر محمد اسحاق ڊار گڏيل عرب امارات جي نائب وزيراعظم ۽ پرڏيهي وزير شيخ عبدالله بن زايد النهيان سان ٽيليفون تي ڳالهه ٻولهه ڪئي. پرڏيهي آفيس پاران جاري بيان موجب ٻنهي اڳواڻن خطي جي بدلجندڙ صورتحال تي خيالن جي ڏي وٺ ڪئي. نائب وزيراعظم اسحاق ڊار امن ۽ استحڪام جي اهميت کي اجاگر ڪندي ڇڪتاڻ ۾ فوري گهٽتائي جي ضرورت تي زور ڏنو. هن ان ڳالهه تي پڻ زور ڏنو ته مسئلن جي حل لاءِ ڳالهه ٻولهه ۽ سفارتڪاري ئي واحد قابل عمل رستو آهي. هن قيمتي جانين جي زيان تي گهري ڏک ۽ افسوس جو اظهار ڪيو جن ۾ ٽي پاڪستاني شهري به شامل آهن. نائب وزيراعظم هن مشڪل وقت ۾ گڏيل عرب امارات سان پاڪستان جي ڀرپور يڪجهتي جو ورجاءُ ڪيو. ٻنهي اڳواڻن عيد جي مبارڪباد جي ڏي وٺ ڪئي ۽ گڏيل ويجهي رابطي ۾ رهڻ تي اتفاق ڪيو.