ڪابينا جي اقتصادي رابطا ڪميٽي 5 لک ميٽرڪ ٽن ڪڻڪ مسابقتي واڪ ذريعي وڪرو ڪرڻ جي منظوري ڏئي ڇڏي

اسلام آباد-24 فيبروري (اي پي پي) ڪابينا جي اقتصادي رابطا ڪميٽي (اي سي سي) پاسڪو جي 5 لک ميٽرڪ ٽن ڪڻڪ مسابقتي واڪ ذريعي وڪرو ڪرڻ جي منظوري ڏئي ڇڏي. اي سي سي جو اجلاس ناڻي واري وفاقي وزير سينيٽر محمد اورنگزيب جي صدارت ۾ منعقد ٿيو. اجلاس ۾ قومي غذائي تحفظ ۽ تحقيق واري وزارت طرفان پاسڪو وٽ موجود 5 لک ميٽرڪ ٽن ڪڻڪ جي ذخيري کي مسابقتي واڪ ذريعي وڪرو ڪرڻ جي تجويز جو جائزو ورتو ويو. ڪميٽي کي آگاهه ڪيو ويو ته پهريان منظور ٿيل ريزرو قيمتن تي ڪڻڪ وڪرو ڪرڻ جي اڳوڻي ڪوشش موصول ٿيل گهٽ ٻولين سبب حتمي شڪل اختيار نه ڪري سگهي، موجود ذخيرن جي صورتحال ۽ ان تي کڻڻ ۽ ذخيرو ڪرڻ جي لاڳت کي نظر ۾ رکندي اي سي سي 5 لک ميٽرڪ ٽن ڪڻڪ کي فرسٽ ان فرسٽ آئوٽ جي بنياد تي مسابقتي واڪ ذريعي وڪرو ڪرڻ جي منظوري ڏئي ڇڏي، جنهن تحت مقامي ڪڻڪ جي نظرثاني ٿيل ريزرو قيمت 4150 روپيه في ڪلوگرام ۽ درآمدي ڪڻڪ جي 3800 روپيه في ڪلوگرام مقرر ڪئي وئي. اجلاس ۾ تحليل ٿيل پاڪستان پبلڪ ورڪس ڊپارٽمنٽ (پاڪ پي ڊبليو ڊي) جي پي ايس ڊي پي منصوبن لاءِ 536 ملين روپين جي فني ضمني گرانٽ جي منظوري ڏني وئي. منظور ٿيل رقم لاڳاپيل قانوني ۽ آئيني تقاضائن جي مطابق مخصوص جاري منصوبن لاءِ پنجاب حڪومت ۽ ڪي پي ڪي حڪومت کي منتقل ڪئي ويندي. اجلاس ۾ پئٽروليم ڊويزن طرفان سينر جيڪو پاڪستان لميٽڊ سان طئي ٿيل معاهدي بابت فيڪٽ فائنڊنگ رپورٽ جو خلاصو به پيش ڪيو ويو جيڪو پئٽروليم ليوي جي ادائيگي ۾ دير جي حوالي سان اي سي سي جي اڳوڻين هدايتن جي تعميل ۾ جمع ڪرايو ويو هو، جڏهن ته ان کي مشاهدي سان واپس ڪيو ويو ته ايندڙ اجلاس ۾ ان تي وڌيڪ جامع بريفنگ پيش ڪئي وڃي. اجلاس ۾ وفاقي وزيرن علي پرويز ملڪ، وفاقي وزير رانا تنوير حسين، قيصر احمد شيخ، وزيراعظم جي خاص مددگار هارون اختر خان ۽ لاڳاپيل وزارتن ۽ ڊويزنز جي اعليٰ عملدارن شرڪت ڪئي.