نواب شاهه لڳ دوڙ ويجهو ٽريفڪ حادثو، ڪار ۽ ويگن ۾ ٽڪر، عورت سميت 2 ڄڻا فوت، 16 زخمي

نواب شاهه-02 فيبروري (اي پي پي) نواب شاهه جي تعلقي دوڙ ويجهو ٽريفڪ حادثي ۾ ڪار ۽ ويگن ۾ ٽڪر سبب عورت سميت 2 ڄڻا فوت، 16 زخمي ٿي پيا. دوڙ ويجهو احمد ڇٽا اسٽاپ لڳ تيز رفتار ڪار ۽ مسافر ويگن وچ ۾ شديد ٽڪر جي نتيجي ۾ هڪ عورت ۽ هڪ مرد فوت جڏهن ته 16 ڄڻا زخمي ٿي پيا. فوتين جي سڃاڻپ وقاص طفيل ۽ شفق خالد جي نالن سان ٿي آهي، جيڪي بهاولپور کان ڪراچي وڃي رهيا هئا. حادثي جي فوري بعد مقامي ماڻهن ۽ ريسڪيو ٽيمن امدادي ڪارروائيون ڪندي زخمين ۽ فوتين کي دوڙ اسپتال منتقل ڪيو. اسپتال ذريعن مطابق زخمين مان 2 ڄڻن جي حالت ڳڻتي جوڳي هجڻ سبب انهن کي وڌيڪ بهتر علاج لاءِ نواب شاهه ريفر ڪيو ويو آهي، جڏهن ته ٻين زخمين کي دوڙ اسپتال ۾ طبي امداد فراهم ڪئي پئي وڃي. زخمين ۾ عزيزان ، سبحاني، دادلي، زاهده، ماروي، سلميٰ، اقبال حسين، بهادر، بشير، امان الله، زاهد، ڪاشف، خادم، معشوق، لونگڙي ۽ سنينا شامل آهن. پوليس مطابق حادثي جو سبب ڄاڻڻ لاءِ جاچ شروع ڪري ڇڏي آهي جڏهن ته حادثي واري هنڌ تان گاڏيون هٽائي ٽريفڪ جي رواني بحال ڪئي وئي آهي.